Ulttyq brend jeńimpazyna – 5 mln teńge

Qandaı da bir eldiń álemge áıgili brendteri sol eldiń týrıstik tartymdylyǵyn jáne ınvestısııalyq tartymdylyǵyn arttyratyny, óndiretin taýarlarynyń tanymal hám senimdi bolýyna yqpal etetini belgili. Tipti, brendıng memlekettiń halyqaralyq arenadaǵy bedeline de áser ete alady. Osy máselege oraı, elimizde alǵash ret «Qazaqstan Respýblıkasynyń Ulttyq brendin» anyqtaý jónindegi respýblıkalyq baıqaý ótpek. Bul týraly Aqparat jáne kommýnıkasııalar mınıstri Dáýren ABAEV óziniń feısbýktegi paraqshasynda habarlady. – Sapaly eldik brendıngke qashanda sol memlekettiń shynaıy jetistikteri negiz bolmaq. Bul degenimiz halyqtyń bilim deńgeıi, ınfraqurylymdy damytý kórsetkishi, sybaılas jemqorlyqpen kúrestegi tıimdiligi, sporttaǵy jáne basqa da jetistikteri. Sonymen qatar, eldiń ımıdjin saýatty túrde ilgeriletý úshin onymen baılanysty obrazdar, ıdeıalar men assosıasııalar kreatıvti, qaıtalanbas ári jadyńda jattalyp qalatyn sımvolıkamen bite qaınasýy kerek. Osyndaı irgeli isti bizdiń elimiz de qolǵa alýda. Atap aıtqanda, búgin Qazaqstannyń Ulttyq brendin anyqtaý jónindegi konkýrs bastalady, – dedi mınıstr. Mınıstrdiń aıtýynsha, brendti anyqtaıtyn baıqaýǵa usynylǵan jumystar mınıstrlik saıtynda bir aıǵa deıin qabyldanady. http://mic.gov.kz/kk/competition saıtynda baıqaýdyń erejesi tolyǵyraq kórsetilgen. Qysqasha aıtyp óter bolsaq, ótinishpen birge logotıp, uran, erkin formada jazylǵan jáne jumystyń máni men mazmunyn ashyp kórsetetin qysqasha tujyrymdama joldanýy tıis. Mınıstrdiń aıtýynsha, baıqaý eki kezeńnen turady. Birinshi kezeńniń jeńimpazdary ınternette daýys berý arqyly anyqtalmaq. Mınıstrlik saıtynda kórsetilgen túrli brendterge daýys bergen ınternet qoldanýshylar 15 kún ishinde úzdik degen jumystardy tańdaıdy. Iriktelip shyqqan jumystar ekinshi kezeńde tanymal qoǵam jáne saıası qaıratkerlerden, mádenıet pen óner maıtalmandarynan jasaqtalǵan Sarapshylyq keńeske usynylady. Keńes quramynda halyqaralyq sarapshylar da bar ekenin aıta ketý kerek. Aqparat jáne kommýnıkasııalar mınıstrligimen qatar, Syrtqy ister mınıstrligi quryltaıshy bolǵan baıqaýdyń jeńimpazyna 5 000 000 teńge kóleminde qarjylaı syıaqy beriledi. Arnur ASQAROV, «Egemen Qazaqstan»