Elbasy: Zańdar halyqqa túsinikti bolýy kerek

Memleket basshysy Nursultan Nazarbaev altynshy saılanǵan QR Parlamentiniń ekinshi sessııasyn ashyp, eldiń zań shyǵarýshy organy aldynda turǵan birqatar mindetter men sharalarǵa toqtaldy. «Birinshiden, Qazaqstan Táýelsizdiktiń 25 jyldyq mereıtoıyn qarsy alýǵa daıyndalyp jatyr. Bul – jyldyń basty oqıǵasy, bul – toı toılaıtyn ǵana kezeń emes, halyqqa eldiń jetistikterin tolyq túsindiretin kezeń. Shırek ǵasyr ishinde júz jylǵa tatıtyn qyrýar sharalar atqaryldy. Meniń oıymsha, halyqqa aıtarymyz da az emes. Osy mereıtoıǵa arnalǵan sharalar qazirden bastalýy tıis. Al ol mereıtoıdyń ózi qorytyndy jasaıtyn shaq bolýy kerek. Árbir qazaqstandyq, árbir aýyl turǵyny eldegi ıgilikti sezinip, bolashaq baǵdardy túsinýi kerek», - dedi Elbasy. Sonymen qatar, Elbasy Qazaqstanda jańǵyrýdyń jańa kezeńi júrgizilip jatqanyn eske sala kele, Parlamentke Úkimetpen syndarly jumysty jalǵastyrýdy tapsyrdy. «Jańa zańdardy ázirleý men qabyldaýǵa qatysty barlyq máseleler boıynsha Úkimetpen tyǵyz, ornyqty jumys jasaý qajet. Bul rette zańdy ázirleýde birinshi kezekte ony halyqqa túsindirýge tıispiz. Eshkimge de túsiniksiz jańalyqtar engizýden qashý kerek», –  dedi Memlket basshysy. Prezıdent atap ótkendeı, Májilis pen Senat depýtattarynyń halyqqa qoljetimdi túrde zańdy túsindirýdegi rólin kúsheıtken mańyzdy. Kez kelgen zań halyq úshin asa mańyzdy bir máseleni sheshýge negizdeledi. Sondaı-aq Nursultan Nazarbaev qazaqstandyqtardyń ómir súrý deńgeıiniń tómendeýine jol bermeýdi tapsyrdy. Memleket tarapynan kepildendirilgen áleýmettik paketke shyǵystar kólemin saqtaýdy zańnamalyq turǵyda qamtamasyz etý kerek ekenin qadap aıtty. «Bul rette bárinen buryn zeınetaqy, járdemaqylarǵa, shákirtaqylarǵa jáne adamdar úshin basqa da áleýmettik tólemderge qatysty bolyp otyr. Qazaqstandyqtardyń ómir súrý deńgeıiniń tómendeýine jol bermeý úshin  bıýdjettik saıasatty tıisti dárejede baǵdarlaý qajet», – dedi Elbasy depýtattardyń aldynda sóılegen sózinde.