Mýzykant Ǵalymjan Moldanazar Vlast basylymyna suhbat berip, óziniń ómiri, kózqarasy, mýzykasy jaıly áńgimeledi. Týǵan jeri, týǵan tili týraly da aıtty. Tómende suhbattan úzindiler berip otyrmyz.
О́zimdi Qazaqstan estradasynyń ókilimin dep sanamaımyn. Ne jasyratyny bar, bizdiń estrada maǵan unamaıdy. Mádenıet, mýzyka, shyǵarmashylyqqa degen mundaı kózqaras unamaıdy. Fonogramma – degen ol qylmys. Jurtty aldap, aqsha alý... Bizdiń adamdar, kórermender ózderin uıalmaı, ashyqtan-ashyq aldap jatqanyn bilýi kerek. Al ártister ózderiniń jasap júrgeni qylmys ekenin túsinýleri kerek. Bul endi... jylaǵyń da, kúlkiń de keledi. Men qylmysker bolǵym kelmeıdi.
***
Menen de myqtylar bar, biraq ázir olar eshkimge kerek bolmaı jatyr. Men baıaǵydan án shyǵaryp kelem, biraq ol ánder kereksiz bolyp Internette jatty. Sosyn Reseıde bireýler «O, bir qazaq kúshti sıntı-pop jasap júr» dedi. Sosyn bizdikiler «O! Bizdiń bala Eýropada birdeńe utyp aldy» dedi. Biraq men oǵan deıin de bolǵam negizi.***
Reseıge birneshe ret shaqyrdy. Biraq barǵym kelmedi. О́ıtkeni, Almatyny óte qatty jaqsy kórem. Bul jerden eshqaıda ketkim kelmeıdi.***
Eshqashan ataqqa, kóp aqsha tabýǵa qyzyqqan emespin. Kóbi «Seniń ornyńda bolsam, basqa jaqqa ketip qalar edim» deıdi. Men ketkim kelmeıdi. Sońyna deıin osynda qalyp, osy qalada made in Kazakhstan deýge turarlyq birdeńe jasasam deımin.***
Qazaq tili ol men úshin dúnıege alǵash kelgende estigen dybystarym. Men ony mektepti bitirgenshe tyńdadym. О́ıtkeni, bizdiń aýylda bir ǵana orys otbasy boldy, olardyń ózi oryssha bilmeıtin.***
Qaırat Nurtasty óz basym syılaımyn. Onyń óz aýdıtorııasy bar. Tipti sondaı úlken aýdıtorııa mende de bolsa deımin. Qaıratty súıip tyńdaıtyn, tyńdap otyryp jylaıtyn jaqyndarym bar. Ol shynymen de adamdarǵa bir sezimder beredi. Ol shynymen de adamdardy bir nárseler týraly oılandyrady.***
Ákem qatal, áskerı adam. Biraq ishteı erkin adam. «Bilgenińdi iste. Eń bastysy, jurtty aldama» deıdi.***
Alty balanyń kishisi boldym. Qazaqta úıdiń kishisi áke-sheshesimen qalady. Al men ketetinimdi mektepte júrgende-aq bildim. Biraq týǵan aýylymdy qatty jaqsy kórem. Jıi baram. Saǵynǵanda bılet alam da ketip qalam. Degenmen... bala kezimde, qazir de ol jermen birtúrli garmonııa taba almaımyn.***
Aýyldyń tárbıesimen óstim. Sondyqtan keı nárselerdi qabyldaý maǵan qıyn. Mysaly, balanyń áke-sheshesimen daýlasqanyn kórgende «Ne bolyp barady ózi?» dep shoshımyn.***
«Sen amerıkan mýzykasyn nasıhattaısyń. MýzART, Qaırat Nurtas – mine bular bizdiki» dep ursady keıde. Men túsindirýge tyrysam: «MýzART pen Qaırat Nurtas elektrondy gıtaramen, sıntezatormen aıtady. Qazaq elektrondy gıtara tartyp pa edi? Qalaısha ony naǵyz qazaq mýzykasy dep aıtasyz?».***
Qazaqsha bolsyn deıtinder toılaryna Kane Ýest, Beıonse, Djennıfer Lopesterdi shaqyrady. Ol jerden dombyra, qobyz kórmeısiz.***
«Nege dombyra tartpaısyń?» dep te ursady. Bir aǵamyzǵa «Mine kóshede kezdestik. Siz nege mersedespen keldińiz, nege atpen kelmedińiz?» dedim.***
Birdeńe durys bolmaı jatsa, bárin tastap qashýǵa bolmaıdy. Árkim óz isin adal atqarsa, eldi syılasa, jáne adamdardy aqshasy úshin emes, adam bolǵany úshin syılasa, jaqsyraq bolady. Patrıotızm degen osy.***
Muny estip bireýler myrs etýileri múmkin. Biraq biz qatty bolyp kettik. Dostarymyzdyń ózine senbeımiz. Adam bolýdan qala bastaǵandaımyz.***
Maıkl Djekson naǵyz korol. Ony synap jatsa, óz basym birtúrli bola bastaımyn.
***
Toılarda án aıtpaıtyn sebebim, toıdyń shyrqyn buzǵym kelmeıdi. «Keıde bireý kelip «Eı inishek, osy seniń aıtyp júrgeniń ne án?» deıdi. Bul da bir pikir. Ony da syılaǵan durys.
