«Hat qorjyn»

OQYRMAN ...jaqsylyǵyn jetkizedi Qart oqyrmandarǵa qamqorlyq Jaqynda N.Baıǵanın atyndaǵy Aqtóbe oblystyq balalar kitap­hana­synyń shyǵarmashylyq ujymy qaladaǵy qarttar úıine at basyn burdyq. Ondaǵy maqsat – qarııalarǵa rýhanı  kómek kórsetý bolatyn. Osynda kitaphanashy bolyp qyzmet atqaratyn Janat Bekentaeva­nyń ótinishine oraı bizdiń kitaphanashylar ádistemelik kómekter kórsetip,  maman retinde is-tájirıbelerimen,  aqyl-keńesterimen bólisti. Kitap­tardy nómirleý, tizimge engizý, oqyrman formýlıaryn jasaqtaý sekildi jumystardy kórsetti. Sonymen qatar ártúrli janrdaǵy kitaptar men gazet-jýrnaldardy syıǵa tartty. – Bizdiń ınternatta 270-ten astam qart kisi bar. Solardyń júz jetpiske jýyǵy kitaphananyń turaqty oqyrmany. Olar kitaphanaǵa kelip, óz qajetterin osy jerden izdeıdi. Alaıda keıde olardyń ótinish­terin taýyp bere almaı jatamyn, sebebi bizge kitaphana úshin memleketten qarjy bólinbeıdi, myna kitaptardyń bári syıǵa berilgen kitaptar ǵana, – dedi Janat Beksultanqyzy. Oblystyq balalar kitaphanasynyń dırektory Gúljaınar Qaldına ár bólmege kirip, qarttarǵa syı-sııapattaryn usyndy. Bul qarttar úıinde qarııalyq jasqa jetpese de múmkindigi shekteýli jandar da bar eken. Az da bolsa kórsetilgen syı-qurmetke olar balasha qýandy. Kamıla IDRISOVA, N.Baıǵanın atyndaǵy kitaphananyń mamany AQTО́BE ...qýanyshyn bólisedi 76 týyndyny tartý etti Atyraý oblystyq Sh.Sarıev atyndaǵy kórkemsýret jáne qoldan­baly-sándik óner mýzeıinde Táýelsizdigimizdiń 25 jyldyǵyna oraı, Á.Qasteev atyndaǵy Memlekettik óner mýzeıi tartý etken týyndylardan jasaqtalǵan «Mýzeıler yntymaqtastyǵy» atty kórme ótti. Búginde jyl basynan beri júrgizilgen kelissózder nátıjesinde Á.Qasteev atyndaǵy Memlekettik óner mýzeıi Atyraý oblystyq óner mýzeıine 76 týyndysyn tartý etip otyr. Kún ótken saıyn qundylyǵy artqan bul eńbekterinde qylqalam sheberleri adamzat balasy úshin mańyzdylyǵyn joımaıtyn ózekti taqyryptardy arqaý etken. Mýzeı qoryna tartý etilgen týyndylardyń deni  belgili sýretshi Sahı Romanovtiki. Kórmeni tanystyrý sátinde  qylqalam sheberleri týyndylarynyń dúnıege kelýine sebepshi bolǵan Semeı polıgony, Ekinshi dúnıejúzilik soǵys pen týǵan jer týraly beınekórsetilim kópshilik nazaryna usynyl­dy. Bunyń ózi mýzeıler yntymaqtastyǵyn maqsat etken ujym­dardyń utymdy jobany qolǵa alǵanyn aıqyndap bergendeı edi. Tursyn QALIMOVA ATYRAÝ ...pikir bildiredi Ǵıbratty ǵumyrbaıan Jaqynda Astana qalasyndaǵy «Shańyraq Medıa» JShS baspasynan belgili jýrnalıst Sádýaqas Jubatovtyń «Asyldyń tuıaǵy» atty kitaby jaryq kórdi. Bul kitapta eline abyroıly qyzmet etken ulaǵatty ustaz Qaıyrǵalı Ishanuly Maqulovtyń órnekti ómiri sóz bolady. «Jaqsynyń jaqsylyǵyn aıt, nury tasysyn» deıtin halyq danalyǵy osyndaıda aıtylatyn bolar. Árbir qalam ustaǵan jornalshy ózi kórgen, estip-bilgen, ómirinde ónegelik iz qaldyrǵan jan týraly áńgime qozǵap jatsa, bir mindetin oryndaǵany da. Meniń de Qaıyrǵalı aǵanyń qarapaıym, biraq maǵynaly ómiri jaıly sóz arnaǵym kelgeni osyndaı maqsattan týǵan edi», dep bastalatyn kitap bes bólimnen turady. «Er topyraǵyna tartady» atalatyn birinshi bóliminde keıipkerdiń týǵan jeri týraly sóz bolsa, «Maquldyń Ishany» atalatyn ekinshi bóliminde batys óńirindegi Naryn qumynda ómir súrgen Qaıyrǵalıdyń ákesi Ishanǵalı jaıly, onyń artynda qaldyrǵan tapqyr áńgimeleri, ádildik úshin, shyndyq úshin qara qyldy qaq jaratyn azamattyǵy týraly aıtylady. «О́lmeıtuǵyn artynda sóz qaldyrǵan», «Biz biletin Qaırekeń», «Áýletiń ósse el bolar» dep atalatyn bólimderge attarynyń ózi aıtyp turǵandaı, keıipkerdi kózi kórgenderdiń, áýlet urpaqtarynyń estelik áńgimeleri arqaý bolǵan. Qaıda júrse de týǵan jerge degen saǵynysh sezimin joǵaltpaǵan aq júrekti asyl jan týraly áserli shyǵarmaǵa qýandyq. Ǵıbraty mol ǵumyrbaıandyq  kitapty  jas urpaqqa taǵylym bolar týyndy dep esepteımiz. Baıan MUHAMBETÁLIEV, Mádenıet qaıratkeri ASTANA  ...maqtan tutady Dertke – shıpa, janǵa – qýat Saryarqanyń tósinde sary qymyz sapyryp, babadan kele jatqan ata kásipti jandandyrǵan «Saǵyp» sharýa qojalyǵyn óńir turǵyndary ǵana emes, kórshiles elderdiń tutynýshylary da jaqsy biledi. Dertke – shıpa, janǵa – qýat ulttyq sýsyn –  qymyz óndirisin órkendetý jolynda ter tógip júrgen sharýashylyqtyń tasy bul kúnde órge domalap tur. Sharýashylyqtaǵy Qambar ata tuqymynyń sany 400-den asqan.  Budan bólek, júzden asa iri qara bar. Búgingi kúni «Saǵyptyń» ónimderi shekaranyń arǵy jaǵyndaǵy tutynýshylardyń da joǵary baǵasyn alyp úlgerdi.  Pavlodarlyq kásiporynnyń qymyzy men qurty Reseı jáne Qytaı memleketterindegi saýda oryndarynda satylymǵa shyǵaryldy. Osy ýaqytqa deıin sharýashylyq Astana qalasynda ótken «Qaraótkel» kórmesiniń altyn medal ıegeri,  Iаkýtııadaǵy «Qymyz  qudaılar sýsyny» halyqaralyq baıqaýynyń jeńimpazy atanyp, 2013 jyly «Qazaqstannyń eń úzdik taýary» baıqaýynda úshinshi oryndy enshilegen. Osylaısha, zamanaýı quraldar kómegimen álemdik talaptarǵa saı qymyz óndiretin «Saǵyp» sharýa qojalyǵy bıik shyńdardy baǵyndyryp keledi. Qundyz QABYLDENOVA Pavlodar oblysy ...alǵys aıtady Kishkentaı juldyzdar qýanyshy Ertis jaǵalaýynda «Aqshyń» korporasııasynyń demeýshilik kórsetýimen semeılik búldirshinder zor qýanyshqa keneldi. Naqty aıtqanda, 322 balaqan merekelik konsert kórip, ózderi de ónerlerin ortaǵa saldy. Olardyń barlyǵy da  qalamyzdaǵy án-bı stýdııalarynan ónerlerin shyńdap, halyqaralyq, respýblıkalyq óner saıystarynan júldemen oralyp júrgen jas talanttar. «Tek qana juldyzdar» degen atpen merekelik konsert ótkizýdegi maqsat – Semeıde halyqaralyq, respýblıkalyq deńgeıdegi óner baıqaýlaryna baryp, Gran-prı jáne júldeli oryndarmen oralyp júrgen talantty balalardy qala jurtshylyǵyna keńinen tanytý. Sharanyń oıdaǵydaı ótýine úlken qoldaý kórsetip, arnaıy bezendirilgen sahna jasatyp, 300-den astam balaǵa merekelik kóńil kúı syılaǵan «Aqshyń» korporasııasynyń basshysy, Shyǵys Qazaqstan oblystyq máslıhatynyń depýtaty Qurmanbaı Marat Serikjanulyna osynda kelgen ata-analar men balalardyń atynan zor alǵysymyzdy aıtamyz. Sátjan QASYMJANULY Shyǵys Qazaqstan oblysy