Tujyrymdama jobasy talqylandy

Elordadaǵy Ulttyq akademııalyq kitaphanada Mádenıet jáne sport mınıstrligi Qazaq ǵylymı-zertteý mádenıet ıns­tıtýtynyń uıymdastyrýymen elimizde kınematografııany 2050 jylǵa deıin damytý tujyrymdamasynyń jobasyna qatysty dóńgelek ústel ótti. Oǵan kınematografshylar, memlekettik jáne úkimettik emes uıymdardyń ókilderi, ǵylym men óner salasyndaǵy zııaly qaýym qatysty. Sharada «Qazaqstan Respýb­lıka­syn­daǵy kınematografııany 2050 jylǵa deıin damytý tujyrymdamasy jobasy» talqylandy. Is-shara barysynda Qazaqstan kınematografııasyn 2050 jylǵa deıin damytý tujyrymdamasynyń jobasyn jete ári tolyq talqylaý, kıno túsirilimniń kólemin arttyrýǵa qaraılasý máseleleri, kıno óneri­niń damýyn qoldaý jáne joǵary sapaly kıno týyndylardy túsirý, kınoteatrlar jelilerin kóbeıtý jáne jetildirý, kıno salasy ekonomıkasynyń ósýi jáne qazaqstandyq kıno ónimderdiń ınvestısııalyq tartymdylyǵyn arttyrý máseleleri qaraldy. Dóńgelek ústel otyrysynda Mádenıet jáne sport mınıstri Arystanbek Muhamedıuly otandyq kınematografııany 2050 jylǵa deıin damytý tujyrymdamasynyń qabyldanýy elimizdegi kıno óneri ahýalyn jaqsartýǵa baǵyttalǵan mańyzdy qadam bolatyndyǵyn basa aıtty. «Elimizdiń Táýelsizdik jyldary ishinde mundaı tujyrymdama alǵash ret ázirlenip otyr. Eger biz kıno týraly jeke zań qabyldaı alsaq, óte qýanyshty oqıǵa bolady. Onda ónerdiń osynaý túrine qatysy bar barlyq qyzmet túrleri jazylar edi. Bul biz úshin óte mańyzdy. Bizge kıno týraly jeke zań asa qajet. Men bul máselege túsinistikpen qaraǵan bizdiń eksperttik qoǵamdastyqqa rızamyn. Sebebi, bul – qarapaıym másele emes. Búginde biz Fransııa, Reseı jáne basqa da elderdiń kınematografııa týraly zańdaryn zerdeledik», – dedi ol. Sonymen qatar, A.Muhamedıuly búgingi kúni elimizde mádenıet týraly óte jaqsy zań qabyl­danǵanyn, onda kitaphana isin, mýzeı isin, kınematografııany jáne basqa da salalardy damytý tetikteri jan-jaqty kórsetilgenin eske saldy. «Egemen-aqparat»