Bıznestiń jabylyp qalmaýyna jol ashady

Otandyq kásiporyndardy bankrot dep tanylǵannan keıin de jabylyp qalýdan aman saqtap qalý múmkindikteri bar. Mundaı múmkindikter «QR keıbir zańnamalyq akti­le­rine ońaltý jáne bankrottyq máseleleri boıynsha ózge­rister men tolyqtyrýlar engizý týraly» zańynda qaras­ty­rylǵan. Keshe Ortalyq kommýnıkasııalar qyzmetinde ótken brıfıngte osy zańnyń tıimdi tustary sóz boldy. Qazirgi tańda elimizde bankrot bolýdyń aldynda turǵan kásiporyndardyń jalpy boryshy 286 mıllıard teńgeden asyp jyǵylady eken. 2 myńǵa tarta kásiporyn osyndaı qıyn jaǵdaıǵa tap bolǵan. Jyl basynan beri 9 aı ishinde 2 247 kásiporyn bankrot bolyp úlgergen. Al joǵaryda aıtylǵan zań olardy tarap ketýden saqtap qalýǵa jol ashyp otyr. Bul shara ekonomıkalyq daǵdarys kárine mingen tusta jumys istep turǵan óndiris oryndary men jumys oryndaryn saqtap qalý úshin qolǵa alynǵany túsinikti. – Zań boıynsha, boryshkerge kredıtormen mámilege kelip, qaryzyn qaıtarý joldary men merzimin kelisýge bolady. Sondaı-aq, bankrot bolǵan kásiporyndy satýǵa jáne menshik ıesin aýystyrýǵa da múmkindik bar, – deıdi Qarjy mı­nıstrligi Memlekettik kirister komıteti Salyq departamentiniń dırektory Erlan Nurlanbaev. Onyń aıtýynsha, boryshker men kredıtordyń bitimge kelýi úshin kelissóz júrgizýine  2 aı ýaqyt beriledi. Osy kezeńde boryshkerge aıyppul salý, bere­shekteri úshin syıaqy esepteý toqtatylady. Taǵy bir aıta keter­ligi, eki taraptyń bitimge kelýi úshin qoıylatyn basty talaptardyń biri – jumyskerlerge bereshek eńbekaqy aldyn ala to­lyqtaı ótelýge tıis. Zańǵa tıisti ózgerister en­gi­zilmeı turǵan kezde sotta qara­latyn bankrottyq rásimder­diń jartysyna jýyǵy úsh aıǵa deıin sozylǵan eken. Tipti árbir onynshy is bir jylǵa deıin qaralypty. Jańadan engizilgen ózgeristerdiń arqasynda bul merzim 2 aımen shektelip otyr, ıaǵnı, ýaqyt únem­deýge jol ashyldy deýge bolady. Álemdik ekonomıkada oryn alǵan kúrdeli ahýal Qazaqstan naryǵyna da áser etip jatqa­ny belgili. Búgingi tańda nesıe berýshilerdiń aldyndaǵy mindettemesin oryndaı almaı, qıyn jaǵdaıǵa tap bolǵan bıznes nysandary az emestigine osy brıfıngte kóz jetkizdik. Soǵan qaramastan, kásipkerler jumys istep turǵan bıznesin saqtap qalýǵa nıetti ekeni túsinikti. Memleket basshysy N.Nazarbaevtyń «100 naqty qadam» Ult Josparynyń aıasynda ázirlengen zań kásipkerler­ge osy múmkindikti usynyp otyr. Memlekettik kirister komıte­ti qazir ony otandyq bıznes ókil­derine túsindirý jumystaryn júrgizip jatyr. Arnur ASQAR, «Egemen Qazaqstan»