Eskerýsiz qalmaǵan erlik

 Qaınıjamal ájeı kórshi eldiń Qazaqstandaǵy elshiligi ókilderiniń ákesiniń «Qyzyl Juldyz» ordenin tapsyrýǵa arnaıy kele jatqanyn estip, júregi jarylardaı qýanǵan. Búginde Táshim Sháripovtiń 6 ul-qyzynan 30 nemere, 33 shóbere, 12 shópshek órbip otyrsa da, keıýananyń erekshe tolǵanatyn sebebi bar. Byltyr óńirde jaryq kórgen «Jeńis soldattary» atty eki tomdyq kitapty paraqtap otyryp, ákesiniń aty-jónin kezdestirmegenine qatty nalyǵan. Sovet aýdany /qazir Aqqaıyń/ Dobrovolskoe eldi mekeniniń týmasy soǵystyń alǵashqy kúnderinen maıdanǵa attanyp, 361-shi atqyshtar dıvızııasynyń 394-shi atqyshtar polkiniń quramynda jaýǵa qarsy atoı salǵan. Nemis basqynshylarynan Ýkraına, Moldova, Rýmynııa, Polsha elderin azat etýge qatysyp, nebir qandy joryqtardy bastan keshken. Osynyń ózi ot pen oqtyń arasynda kún-tún qatyp júrgen maıdangerdiń erlik joldaryn aıǵaqtap turǵan joq pa? Al kitapty qurastyrýshylardyń máseleniń mánisin soǵys ardageriniń esepte turmaǵanymen túsindirgenine kúlersiń be, jylarsyń ba? Anasynyń tilegin eki etpegen úlken uly ınternet arqyly izdestirgende qaı jerde, qandaı maıdanda shaıqasqanyna deıin taýyp alady. Jınaqtalǵan derekter aýdandyq qorǵanys isi jónin­degi basqarmaǵa beriledi. Birde Reseı Federasııasynyń elshiliginen telefon soǵylyp, kezinde belgisiz mara­patqa usynylǵanyn, alaıda belgisiz sebeptermen tapsyrylmaı qal­ǵanyn habarlaıdy. Bul jaǵymdy jańalyq mundaǵylardy tóbelerinen jaı túskendeı áserge bóleıdi. «Igiliktiń erte-keshi joq» degen táýbeshil halyqpyz ǵoı. Sóıtse, fashıs­terdi uıasynda talqandaǵannan keıin jas jaýynger ózgelermen birge Qıyr Shyǵysqa attanǵan. Bul týraly týǵan-týystary bilmegen, keıin marqum da tis jara qoımaǵan. Japondarmen jan alysyp, jan berisken urysta qazaqtyń qyran jigiti arystansha arpalysqan. Jańbyrsha oq sebelep turǵan pýlemettiń únin óshi­rip, qarýlastaryn qoıan-qoltyq aıqasqa bastap shyqqan. Osy kózsiz erlik jaýyngerlik joǵary ataqqa usynylǵan. Reseı Federasııasynyń Qazaq­standaǵy elshiliginiń baspasóz hatshysy Iýlııa Lazovskaıa Ekinshi dúnıejúzi­lik soǵysta eren erliktiń úlgisin kórset­ken Táshim Sháripovtiń «Qyzyl Juldyz» ordeniniń kýáligin 71 jyldan keıin tý­ǵan-týystaryna saltanatty jaǵ­daıda tabys etti. Erlik óshpeıdi, er umytylmaıdy degen osy. – Ákemiz sol joly aýyr jaraqat alyp, gospıtalda jarty jyldaı emdelgen. Bir kózi men qolynan aıyrylǵan ony elge meıirbıkeler jetkizip salǵan. Bar-joǵy 48 jasynda ómirden ozdy. Men ol kezde eki aılyq shaqalaq eke­n­min, – dep Qaınıjamal apaı asqar taý panasy jaıly tebirene eske aldy. О́mir ESQALI, «Egemen Qazaqstan» Soltústik Qazaqstan oblysy Sýretti túsirgen Amangeldi BEKMURATOV