Qazaqstan Prezıdenti jańa Sport saraıyna bardy

Elbasy Nursultan Nazarbaev Sport saraıynda jeńil atletıka manejin, muz aıdynyn jáne oqý-jattyǵý bazasyn aralap kórdi, dep habarlaıdy Egemen-aqparat. Memleket basshysy sondaı-aq, kórkem gımnastıka óneri kórsetilimin, jeńil atletıka men hokkeı jattyǵýlaryn tamashalady. Budan bólek, Nursultan Nazarbaev Soltústik Qazaqstan oblysy jurtshylyǵy ókilderimen kezdesti. Kezdesýge kásipkerler, áleýmettik sala qyzmetkerleri, ardagerler, jastar belsendileri, qoǵamdyq uıymdar men etnomádenı birlestikterdiń jetekshileri qatysty. Memleket basshysy áńgime barysynda Soltústik Qazaqstannyń respýblıka boıynsha barlyq astyq kóleminiń úshten birin ósiretin jetekshi agrarlyq-ındýstrııalyq óńir ekenin atap ótti. Sondaı-aq, Qazaqstannyń básekege qabilettiligin arttyrýdaǵy oblystyń úlesine nazar aýdardy. Qazaqstan Prezıdenti táýelsizdik jyldary kóp nársege qol jetkizilgenin, biraq árbir qazaqstandyq otbasynyń turmysyn túzep, ál-aýqatyn jaqsartý úshin áli de kóp sharýa tyndyrý qajettigin aıtty. Kezdesý sońynda Nursultan Nazarbaev jınalǵandarǵa zor densaýlyq pen baq-bereke tiledi. Egemen-aqparat