Baıqońyrdyń berekesi artyp keledi

Qazaqstandyq balalar kúni keshege deıin mektepte «Prezıdentimiz – Pýtın» dep sabaq ótetin. Táýelsizdik aldyq, azattyqqa qol jetkizdik dep bórkimizdi aspanǵa atyp júrgenimizdi qaıteıik, eger ózińnen týǵan ulyń ózge eldiń basshysyn prezıdentim dep tanyp, ánuranynyn aıtyp, týyna táý etip jatsa. Bulaı bolýynyń sebebi nede? Baıqońyrdaǵy barlyq mektep qazaqstandyq standartqa sáıkes oqytpaıtyn. Reseıdiń negizinde bilim beretin. Mektepteri de, oqýlyqtary da Qazaqstannyń ıeliginde emes-tin. Sodan kelip jer kindigi sanalatyn juldyzdy qalashyqtaǵy balalar «Prezıdentimiz – Pýtın» demegende qaıtsin?! Táýelsizdik alǵanymyzǵa shırek ǵasyr ýaqyt tolǵanǵa deıin osylaı bolyp keldi. Seń eki jyl buryn ǵana qozǵaldy. Sodan Qazaqstan men Reseı arasynda Úkimetaralyq komıssııa qurylyp, Baıqońyrdyń máselesi qaıta qarala bastady. Qos eldiń Úkimet músheleri birneshe otyrys ótkizip, qaladaǵy problemalardy birlese sheshýdiń joldaryn qarastyrdy. Sonyń nátıjesinde Baıqońyr qalasynda 6 mektep pen bir balabaqsha qazaqstandyq standartta bilim berýge kóshti. Sońǵy Máskeýde ótken májiliste biraz másele sheshimin tapty. Reseı tarapynan Úkimet tóraǵasynyń orynbasary Dmıtrıı Rogozın jáne Qazaqstan jaǵynan sol kezdegi Premer-Mı­nıstrdiń birinshi orynbasary Baqytjan Saǵyntaev tóraǵalyq jasady. Májiliste «Baıqońyr» kesheniniń qyzmetine jáne birikken jobalardy júzege asyrýdyń kókeıtesti máseleleri, sondaı-aq keshendi birlesip paıdalaný jónindegi «Jol kartasynyń» oryndalý barysy, Baıqońyr qalasynyń, Tóretam men Aqaı aýyldyq okrýgteriniń ınfraqurylymyn damytý, keshenniń nysandary men múlikterin saqtaý máseleleri qaraldy. Memleketaralyq kelisimderge sáıkes Baı­qońyr qalasynda 2007 jyly Qazaqstannyń esebinen 80 oryndyq perzenthana, aýysymyna 100 adam qabyldaıtyn áıelderge keńes berý úıiniń qurylysy bastalǵan edi. Qurylys 2010 jyldyń sońynda aıaqtaldy. Biraq Reseı tarapy ártúrli sebeptermen ǵımaratty óz teńgerimine alýdy osy ýaqytqa deıin shegerip keledi. Al 2015 jyldyń tamyzynda Reseı úkimeti resmı túrde ony óz teńgerimine alýdan bas tartty. Mundaı jaǵdaıda Qazaqstan tarapy osy nysan negizinde qazaqstandyq azamattarǵa qyzmet kórsetetin medısınalyq mekeme ashýǵa daıyn ekendigin bildirgen edi. Osy májiliste bul másele túpkilikti sheshimin tapty. Oblys ákimdiginiń bastamasy boıynsha úkimetaralyq komıssııanyń májilisi sheńberinde Baıqońyr qalasynda qazaqstandyq medısınalyq uıym ashý jóninde sheshim qabyldandy. Atalǵan emhana tamyz aıynan bastap óz jumysyna kiristi. Ortalyq ǵımaratynyń qurylysyna 1 mıllıard teńgeden astam qarajat jumsalǵan. Soltústik aýdandarda turatyn 240 myń halyq endi dertine shıpa izdep oblys ortalyǵyna sabylmaıtyn boldy. Barlyq medısınalyq kómek Baıqońyr qalasynda jasala beredi. Máskeýdegi májiliste «Baıqońyr» keshenindegi 14 nysandy Qyzylorda oblysynyń kommýnaldyq menshigine berý máseleleri qaraldy. Olar shaǵyn jáne orta bıznestiń damýyna jáne Baıqońyr qalasy turǵyndaryna qolaıly jaǵdaı jasaý maqsatynda qyzmet etedi. Aınalasy az ǵana ýaqyt­tyń ishinde alty mektep pen bir balabaqsha Qazaqstan tarapyna ótip, birneshe aýdanǵa qatar qyzmet kórsetetin medısınalyq ortalyq ashylyp, ondaǵan nysan bizdiń ıeligimizge berildi. Bul – úlken eńbektiń nátıjesi. Al osyny eldiń berekesi demeı kórińiz? Erjan BAITILES, «Egemen Qazaqstan» Qyzylorda oblysy