Almatyda qantógis jasaǵan Kúlekbaev sybaılastarymen birge sotqa jiberildi

Almatyda polısııa qyzmetkerlerine shabýyl jasaǵan Rýslan Kúlekbaev pen onyń 5 sybaılasy sotqa jiberildi, dep habarlaıdy Egemen-aqparat Almaty qalasy prokýratýrasynyń saıtyna silteme jasap. Qala prokýratýrasynyń málimetterine qaraǵanda, QR Bas prokýratýrasy vedomstvoaralyq tergeý toby arnaıy prokýrordyń basshylyǵymen Almatyda 2016 jyldyń 18-shildesi kúni bolǵan terrorlyq aktige baılanysty qylmystyq is boıynsha sot aldyndaǵy tergeý jumystaryn aıaqtady. Tergeý amaldary bastalǵan alǵashqy kúnnen bastap-aq qala prokýrory qadaǵalaý jumystarynyń tıimdi bolýy úshin prosessýaldy prokýrorlar tobyn qurdy. Olar tergeý jumystarynyń barynsha qysqa merzimde aıaqtalýyna yqpal etti. Tergeý toby 57 sot saraptamasy men zertteýler júrgizdi jáne bolǵan oqıǵanyń barlyq jáıtterin anyqtaý maqsatynda 200-den astam kýágerler men oqıǵany kórgen adamdardy tergedi. 2016 jyldyń 12 qazanynda 60 tomnan turatyn qylmystyq istiń materıaldaryn zertteý nátıjesi boıynsha, sotqa Kúlekbaev pen ózge de azamattar jiberildi. R.Kúlekbaevqa nátıjesi 8 quqyq qorǵaý jáne arnaıy organdardyń qyzmetkerleriniń jáne 2 beıbit turǵynnyń ólimine alyp kelgen terrorlyq akt jasady degen aıyp taǵyldy. Sonymen qatar ol 3 beıbit turǵyndy óltirmek boldy dep aıyptalyp otyr. R.Kúlekbaevpen birge sotqa atys qarýyn zańsyz saqtap, ózimen birge alyp júrip, R.Kúlekbaevpen birlesip M. atty kásipkerdiń úıine qaraqshylyq shabýyl uıymdastyrǵan R.Lıý, J.Saparbekov, D.Ásembekuly, E.Qusaıynov, N.Ábdimomyn da sotqa berildi. Qylmystyq is Almaty qalasynyń qylmystyq ister jónindegi arnaıy mamandandyrylǵan aýdanaralyq sotyna joldandy.