Bas prokýror úleskerlik máselesinde jarnamaǵa senbeýge shaqyrdy

Kez-kelgen jarnamaǵa, aýyzsha bergen ýádege senip, «úı salatyn jeri bar eken ǵoı» dep aqshalaryńyzdy kim bolsa soǵan bermeńizder. Búgin Qazaqstan halqyna úndeý jasaǵan elimizdiń Bas prokýrory Jaqyp Asanov osylaı málimdedi, dep habarlaıdy egemen.kz «Turǵyn úı ómirdegi eń basty qajettiliktiń biri. Halqymyz «Úıi joqtyń kúıi joq» dep beker aıtpaıdy. Ony qol jetimdi etý úshin elimizde arnaıy baǵdarlamalar iske asýda. 25 jylda mıllıonnan astam otbasy baspanaly boldy. Biraq, osy máseleniń basqa da jaǵy bar. Keıbir qurylys kompanııalary arzan baǵamen qyzyqtyryp, kúmándi sharttar usynyp, kóp adamdy aldap ketti. Azamattar jyldap jınaǵan aqshasynan aıyrylyp, armandaǵan páterin ala almaı qalǵan. 3 kún buryn, 10 qazanda jańa zań qoldanysqa endi. Endi qurylys kompanııalary úleskerlerdiń aqshasyn tek eki jaǵdaıda - arnaıy Qor kompanııaǵa kepildik berse nemese ákimdiktiń ruqsat qaǵazy bolsa ǵana tarta alady», - dedi Bas prokýror. Osy rette Jaqyp Asanov halyqqa ákimdik ruqsatty qandaı jaǵdaıda beriletindigin de tolyq túsindirip berdi. «Qurylys bitedi dep bank kepildik berse nemese úıdiń qańqasy (karkasy) salynyp bitse. Sóıtip, bul zań alaıaqtardyń qarmaǵyna túsip qalmaýǵa bóget bolmaq. Sondyqtan qazaqstandyqtardy zańǵa súıenip, eskertetinim  kez-kelgen jarnamaǵa, aýyzsha bergen ýádege senip, «úı salatyn jeri bar eken ǵoı» dep aqshalaryńyzdy kim bolsa soǵan bermeńizder! Sózsiz, árkim óz aqshasyna ózi ıe. Biraq, kompanııanyń qujattary zań talaptaryna sáıkes bolmasa da, oǵan aqshasyn berip, aldanyp qalǵandardyń aldynda jergilikti ákimdik te, Kepildik qory da jaýap bermeıdi. Árıne, alaıaqtar qylmystyq jaýapkershilikke tartylar. Biraq, túbinde úıdiń qurylysy aıaǵyna deıin bitpeı, aqshańyz qaıtarylmaı qalýy múmkin», - dedi Asanov. Aıta keteıik, Bas prokýror bul úndeýin «Prokýratýra týraly» Zańnyń 25-2 babyn basshylyqqa ala otyryp jasady.