Astanadaǵy Orynbor kóshesiniń aty ózgerýi múmkin

Elordanyń Onomastıka komıssııasyna Orynbor kóshesin «Máńgilik el» dep ózgertý týraly usynys kelip tústi. Bul týraly búgin «Astana qalasynyń birqatar kóshelerine ataý berý jáne qaıta ataý týraly» taqyrypta ótken qoǵamdyq tyńdaý barysynda qalalyq tilderdi damytý jónindegi basqarmanyń basshysy Tileýǵalı Qyshqashbaev habarlady. «Orynbor kóshesiniń ataýy kaıta ózgerýi múmkin. Orynbor - bizdiń alǵashqy astanamyz ekenin barlyqtaryńyz bilesizder. Alaıda Orynbor kóshesi ataýy tolyq óshirilmeıdi, ol basqa jerde paıda bolýy múmkin (...). Astana turǵyndary (usynysty - red) qoldap otyr. Dańǵyl Máńgilik el bolyp ózgerýi múmkin», - dedi ol. Onyń aıtýynsha, buǵan dańǵyldyń boıynda «Máńgilik el» trımfaldy arkasynyń ornalasýy sebepshi bolyp otyr. Kóshe ataýyn ózgertý týraly usynys qalanyń zıaıyl qaýym ókilderinen kelip túsken. Tileýǵalı Qyshqashbaevtyń atap ótýinshe, jalpy alǵanda qalanyń onomastıka komıssııasyna 77 ótinim kelip túsken,  onyń 20-sy boıynsha usynystar eskerilip, qalǵandary keri qaıtarylǵan.