Latvııamen aradaǵy qashyqtyqty "qysqartýǵa" tyrysamyz - Vasılenko

«Qazaqstan men Latvııa arasyn baılanystyrýdaǵy eń negizgi kedergi – ol araqashyqtyq. Máselen, Astana men Rıga arasyndaǵy araqashyqtyq – 3700 shaqyrym. Biraq biz, soǵan qaramastan, eki eldi alshaqtatyp turǵan osy qashyqtyqty «qysqartýǵa» barynsha kúsh salatyn bolamyz».  Qazaqstan men Latvııanyń ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııasynyń 6-shy otyrysy kezinde sóılegen sózinde elimizdiń Syrtqy ister mınıstriniń orynbasary Roman Vasılenko osylaı dedi. Otyrysqa Roman Vasılenkomen birge Latvııa Respýblıkasynyń Baılanys mınıstri Ýldıs Aýgýlıs teń tóraǵalyq etti. Aýqymdy máseleler kóterilgen jıyn jumysyna ınvestısııalyq klımatty jaqsartý baǵytynda qyzmet atqaryp jatqan memlekettik uıymdar men iskerlik qurylymdardyń ókilderi qatysty. Al Latvııadan kelgen delegasııanyń quramynda ekonomıka, bilim jáne ǵylym, qorshaǵan ortany qorǵaý mınıstrlikteriniń joǵary laýazymdy ókilderi, sonymen qatar, osy eldiń birqatar kásipkerleri boldy. Otyrys barysynda taraptar kólik jáne tranzıt, týrızm, aýyl sharýashylyǵy, bilim jáne ǵylym, «jasyl» ekonomıka salalaryndaǵy ekijaqty yntymaqtastyq, sondaı-aq, Latvııanyń «EKSPO-2017» halyqaralyq mamandandyrylǵan kórmesine qatysý máselelerin talqylady. Jıyn sońynda 6-shy Úkimetaralyq komıssııanyń Hattamasyna qol qoıyldy. Qol qoıý rásiminen keıin Roman Vasılenko men Ýldıs Aýgýlıs qysqasha málimdeme jasady, sonymen qatar, jýrnalısterdiń saýaldaryna jaýap berdi. R.Vasılenko Úkimetaralyq komıssııa quramyndaǵy qos tarap múshelerine aýqymdy jumystary úshin alǵysyn bildirdi. «Biz otyrys barysynda kóp jáıtti talqylaýǵa múmkindik aldyq. Komıssııanyń kún tártibine 11 tarmaqtan turatyn máseleleler qoıyldy. Keıbir tarmaqtar óz ishinde 5 tarmaqshanyń basyn biriktirdi. Olar kóliktiń barlyq túrine qatysty máselelerdi qamtıdy. Bizdiń áriptestik áleýetimiz óte joǵary. Árıne, ekonomıkalyq yqpaldastyqty damytýǵa kedergi keltirip otyrǵan faktorlar áli de kezdesedi. Biz otyrys aıasynda solardy sheshýdiń baǵyt-baǵdaryn aıqyndadyq», – dedi R. Vasılenko. Sonymen qatar, ol Latvııanyń teńiz porttary arqyly Qazaqstannyń eksporttyq júkterin Batys naryqtaryna jetkizýge jol ashylatynyn, osy oraıda bul eldi strategııalyq seriktes retinde erekshe baǵalaıtynyn jetkizdi. «Sondaı-aq, keri baǵytta Eýrazııalyq ekonomıkalyq odaq elderine, Ortalyq Azııa memleketterine, QHR-ǵa, sonymen qatar, Azııanyń basqa da elderine júkterdi jetkizýde bul áriptestiktiń alar orny aıryqsha. Qazirgi tańda Eýrazııalyq ekonomıkalyq odaqtyń 170 mln tutynýshyny qamtıtyn biryńǵaı naryǵyna shyǵý úshin barlyq jaǵdaı jasalǵan. Qazaqstan Latvııa bıznesiniń el ekonomıkasynyń damýyna qatysýyna múddelilik tanytyp otyr. Qazirdiń ózinde Qazaqstanda 60-qa jýyq birlesken kásiporynnyń tetigi iske qosyldy», – dedi ol.  Buǵan qosa, R.Vasılenko Úkimetaralyq komıssııanyń 6-shy otyrysynda qol qoıylǵan Hattamada naqty atqarylýy tıis máseleler kórsetilgenin jetkizdi. «Latvııanyń «Ventspıls» portynda eki eldiń kásiporyndary birlesip iske qosqan astyq termınaly jumys istep tur. Bul termınaldyń jyl saıyn 2,5 mln tonnadaı astyq ótkizetindeı qýaty bar. Ázirge termınal arqyly jylyna 500 tonnadan 700 tonnaǵa deıin astyq tasymaldanady. Bizdiń aldymyzda turǵan endigi mindet – onyń qýaty men áleýetin tolyqtaı paıdalaný.»,– dedi R. Vasılenko. Al Ýldıs Aýgýlıs Úkimetaralyq komıssııa buǵan deıin kóptegen jumystyń basyn qaıyrǵanyna, al bul otyrys alda atqarylar is-sharalardy aıqyndaýǵa sep bolǵanyna toqtaldy. «Men qyzmet etetin sala – ol kólik jáne tranzıt. Sol sebepti, kóliktik-logıstıkalyq, tranzıttik salalardaǵy yntymaqtastyqty damytyp jatyrmyz», – dedi ol.   Láıla EDILQYZY