Úı janynan snarıad tabyldy

Máseleniń mánisi mynada. Aýyl adamynyń kúndelikti sharýasy men qam-qaraketi taýsylǵan ba?! Tirliktiń osyndaı qamymen Ilbishin aýyly turǵyndarynyń biri úıine sý qubyryn ótkizý úshin onyń aınalasyn qaza bastaıdy. Bir kezde úı ıesi topyraqtyń arasynda jatqan bir jaǵy tik, ekinshi ushy úshkir, dóńesteý kelgen belgisiz zatqa tap bolady. Sodan soń bul ózi jarylǵysh zat emes pe eken dep sál oılanyp qalady da, saqtyq jasap, jergilikti polısııaǵa habar beredi. Onyń kúdigi rasqa shyǵady. Batys Qazaqstan oblystyq Ishki ister departamenti baspasóz qyz­metinen alynǵan derek aýyl turǵyny tap bolǵan shaǵyn sopaqsha zat azamat soǵysy kezinde jarylmaı qalǵan snarıad ekenin aıǵaqtap otyr. Aýyl azamaty úıiniń irgesinde jatqan snarıadtyń uzyndyǵy 32 santımetr, al dıametri 76 mılımetr bolyp shyqty. Budan soń jarylǵysh zat­ty arnaıy mamandar qaýipsizdik sharalaryn saqtaı otyryp, zalal­syzdandyrdy. Osy arada aıta keterlik taǵy bir jáıt – Ilbishin joǵaryda aıtylǵandaı azamat soǵysy dep atalǵan jyldar­da qııan-keski shaıqastardyń orta­lyǵy bolǵany. Bul arada anekdottardyń aty ańyzǵa aınalǵan keıipkeri Vasılıı Chapaevtyń belgili №25 dıvızııasy ornalasqany ári onyń osy mańda jaraly kúıinde Jaıyqtyń arǵy betine júzip jete almaı sýǵa batyp mert bolǵany tarıhı derekterden belgili. Temir QUSAIYN, «Egemen Qazaqstan» Batys Qazaqstan oblysy, Aqjaıyq aýdany, Ilbishin aýyly