Densaýlyqtyń «syrqatyn» dóp basqan

Elimizdiń bas basylymy – «Egemen Qazaqstan» gazeti qarapaıym halyqtyń kókeıkesti múddelerin qozǵaǵan ótkir taqyryptarǵa qalam tarta bastady. Oǵan gazettiń bıylǵy 11 tamyz kúngi sanynda jaryq kórgen jýrnalıst Jylqybaı Jaǵyparulynyń «Devıatkodan Dúısenovaǵa deıin» degen maqalasy tolyq dálel bola alady. Maqala búginde dárigerge senimin joǵalta bastaǵan halyqtyń ashy muńyn ashyq kórsetipti. («Egemen Qazaqstan», №153. 11 tamyz, 2016 jyl) Avtor Jylqybaı Jaǵyparuly densaýlyq saqtaý salasynyń «syrqattaryn» dóp basqan. Mindetti áleýmettik medısınany saqtandyrýǵa qatysty onyń «Qolda bar bilikti kadrlar men memleket qarjysyna alynǵan qymbat zamanaýı qondyrǵylarǵa ıelik júrgize bastaǵan densaýlyq saqtaý salasynyń jańa baıshykeshteri ádiletti júıeniń tamyr jaıýyna kedergi keltirip baǵatyny anyq» degeniniń ózi-aq túsingen janǵa talaı nárseni meńzep tur. Muny jýrnalıst óz basynan ótkizgen mashaqatpen dáleldegen. Jekemenshik medısına­lyq ortalyqtardyń bireýinen bastap, ári qaraı basynan ótkergen sergeldeń jaıynda oqyp otyryp, jaǵańdy ustamasqa amal qaısy? Aldyna kelýshilerden eń aldymen tek aqsha dámetken dárigerlermen bizdiń elimiz alysqa barmaıdy. Osy bizde medısınalyq mekemeler densaýlyqty saqtaýshy ma, álde densaýlyqty qorlaýshy ma? Kabınetten kabınetke barǵan saıyn qaltasyn qaqqan emdelýshide ne kúı qalsyn? Iаǵnı, ol «mynaǵan aqsham jete me?» degen ýaıymnyń ózinen-aq sharshap ketpeı me? Kólemdi maqaladan túıgen oıymyz osy. Demek, adam densaýlyǵyn saýdaǵa salǵan jekemenshik medısınalyq mekemeler tolyq tekserilýge tıisti. Durysynyń durys ekeni aıtylyp, burysy burys ekeni jalǵannyń jaryǵyna shyǵýy qajet. Al «burys» degenińe shash jetpeıtinin aıtyp jatý artyq shyǵar. Prokýratýra organdary ózderin osyndaıda kórsetpegende, basqa qashan dep oılaımyn. Zań saqshylaryn myna maqala beıjaı qaldyrmaýy kerek. Kókeıkesti maqalada aıtylǵan keleńsiz kemshilikter qaǵaz júzinde qalmaýy kerek. Tıisti organdar jáne Densaýlyq saqtaý jáne áleý­mettik damý mınıstrligi maqalada keltiril­gen máselelerge baılanysty gazet arqyly halyq­qa naqty jaýap berýge tıis. Sondyqtan qoly­ma qalam alyp, maqalaǵa ún qosýdy paryz sanadym. Bolat QOSJANULY, «Egemen Qazaqstannyń» baıyrǵy oqyrmany Batys Qazaqstan oblysy, Aqjaıyq aýdany, Chapaev aýyly