"Páterdi jalǵa berýshi onda turatyn adamdy tirkeýge mindetti"

Májilis depýtattary baspanada tirkeýsiz 30 kúnge deıin turý múmkindigin usynýda. Bul týraly búgin Senatta Qazaqstan Respýblıkasynda dinı ekstremızm men terrorızmge qarsy is-qımyl jónindegi 2013 - 2017 jyldarǵa arnalǵan memlekettik baǵdarlamany júzege asyrý máseleleri boıynsha depýtattar men múddeli memlekettik organdardyń kezdesýinde QR Parlamenti Májilisiniń depýtaty Máýlen Áshimbaev málim etti. «Jalpy, Qazaqstan azamattaryna IIM 10 kúndi usynyp, keıinnen tirkeýge turý qajettigin eskergen edi. Biraq ta túrli jaǵdaılardyń bolýyn qarastyra otyryp, ıaǵnı qonaqqa, jumysymen barǵanda 10 kún jetpeýi múmkin, osy rette bul merzimdi 30 kúnge deıin arttyrýdy usynýdamyz. Eger de adam jumys babymen, týystaryna saparlap kelse, basqa qalada tirkeýsiz júrýine 30 kúnge deıin merzim qamtylýy tıis. Osydan keıin tirkeýge turý qajet bolady. Ishki ister mınıstrliginiń usynysy boıynsha eger de adam tirkelmese, ol ózi jekeleı, sondaı-aq páterdiń ıesi de jaýapty bolady. Iаǵnı, barlyq páter ıelerin týysqandary kelgen jaǵdaıda tirkeýge turǵyzý mindettelgen bolatyn, eger de tirkeý jasalmasa, onda aıyppul qarastyrylǵan. Bul norma terrorızmmen jáne ekstremızmmen kúreske qatysy joq ekenin, sonymen qatar qoǵamda jaǵymsyz rezonans týdyryp otyrǵanyn eskere kele, Májilis tek tirkeýdi ǵana retke keltirýdi jáne páterlerin jalǵa beretin menshik ıeleriniń jaýapkershiligin bekitýdi usynady. Eger de páterdi jalǵa berse, ol osy turǵyndy tirkeýge mindetti. Osy oraıda 10 kún ýaqyt beriledi»,-dep túsindirdi M. Áshimbaev. Onyń sózine qaraǵanda, bul turǵydaǵy sharalar arqyly páterlerdi jalǵa berý baǵyty sekildi eń úlken segmentti retke keltirýge bolady. Esterińizge sala keteıik, «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy Májilistiń qaraýynda jatyr. Búginde osy zań jobasy boıynsha qyzý talqylaýlar júrgizilýde.