Aýyl oqýshysy 150 myń dollardyń sertıfıkatyn jeńip aldy

Aqtóbe oblysynda turatyn 15 jasar Móldir Jubaeva Túrkııanyń kez kelgen joǵary oqý ornynda bilim ala alady, dep habarlaıdy egemen.kz Vaq.kz-ke silteme jasap. Yrǵyzdyq on birinshi synyp oqýshysy úsh jyldyń ishinde túrik tilin úırenip, halyqaralyq konkýrsta aqyn Qadyr Myrzálıevtiń shyǵarmashylyǵy týraly jobany qorǵady. «Dıapazon» gazetiniń málimetinshe, oqýshy qyz shyǵys ádebıetin súıip oqıdy. Túrik tilin telehıkaıalardyń arqasynda úırenip alǵan. Ol túrik serıaldaryn túpnusqada kórip, aýdaryp mashyqtanǵan eken. Mektep oqýshysy qazaq tili men ádebıetinen barlyq olımpıadalar men konkýrstarǵa qatysyp júrip, ınternet arqyly halyqaralyq jobalarda da baǵyn synap kórýge bel býypty. «Ata-anam ınternette kóp otyrýyma qarsy boldy. Alaıda taıaýda osy jerden halyqaralyq jobalar týraly oqyp-bildim. Sóıtip oǵan qatysýǵa sheshim qabyldadym, – deıdi Móldir. – Qatysýshylar arasynda álemniń 50 eliniń oqýshylary boldy. Gran-prı alamyn dep oılaǵan joqpyn, óıtkeni qarsylastarym óte myqty edi. Degenmen, men úzdik shyqtym. Jeńiske jettiń degende, sengen joqpyn. Meni UBT-dan bosatty». Jeńimpazǵa bas júlde retinde 150 myń dollardyń sertıfıkaty berildi. Ol aýyl oqýshysyna Túrkııanyń kez kelgen oqý ornynda bilim alýǵa múmkindik beredi. Sonymen qatar Móldir Parıjge joldama jeńip aldy. Synyp jetekshisi men mektep dırektoryna da Taıland pen Dýbaıǵa joldama tabystalypty. «Sertıfıkatty aldyq, alaıda qyzym áli qaıda oqıtynyn sheshken joq», – deıdi Móldirdiń ákesi.   Yrǵyz mektep-gımnazııasynyń muǵalimderi Móldir kópbalaly otbasynan shyqqanyn habarlady. Jubaevtardyń otbasynda bes bala tárbıelenýde. Qyzdyń anasy – bastaýysh synyp muǵalimi, ákesi zeınette. Ol da bilim salasynda eńbek etken. Móldir Jubaeva jýrnalıst mamandyǵyn alyp, óziniń telearnasyn ashýdy armandaıdy. Sondaı-aq ol belgili qazaq jazýshylarynyń kitaptaryn túrik tiline aýdarǵysy keledi.