BQO bıýdjeti qansha teńge?

Batys Qazaqstan oblysynyń bıýdjeti 3,2 mlrd. teńgege naqtylanyp, kiristeri men shyǵystary boıynsha 134,7 mlrd. teńgege jetti. Bul týraly búgin oblys ákimi Altaı Kólginovtiń qatysýymen ótken oblystyq máslıhattyń kezekten tys 7-sessııasynda aıtyldy, dep habarlaıdy QazAqparat. Onda oblystyq ekonomıka jáne bıýdjettik josparlaý basqarmasynyń basshysy Qaısar Mańqaraevtyń málim etkenindeı, óńir bıýdjetiniń osynsha kólemde naqtylanýy respýblıkalyq bıýdjet pen Ulttyq qordan qosymsha bólinetin 1698,9 mln. teńgeniń maqsatty transfertterine, oblystyq bıýdjet kiris boljamynyń 677,6 mln. teńgege túzetilýi jáne bıýdjettik baǵdarlamalar ákimshileri arasynda 877,2 mln. teńge qarajattyń qaıta bólinýine baılanysty bolyp otyr. Sonyń ishinde maqsatty transfertter esebinen 2013-2020 jyldarǵa arnalǵan «Agrobıznes - 2020» baǵdarlamasy aıasynda agroónerkásip keshenin qoldaýǵa - 1028,8 mln. teńge, gaz tasymaldaý júıesin damytýǵa - 700 mln. teńge, mektepterdi salý men qaıta qurýǵa 293,2 mln. teńge berilmek. Esesine «О́ńirlerde jeke kásipkerlikti qoldaý» baǵdarlamasy boıynsha transfertter 681 mln. teńgege azaıtyldy. Sonymen qatar oblystyq bıýdjetten densaýlyq saqtaýǵa 11,9 mln. teńge, aýyl sharýashylyǵyna 20,3 mln. teńge, mádenıet pen sportqa 99,5 mln. teńge, turǵyn úı-kommýnaldyq sharýashylyq salasyna 475,5 mln. teńge qosymsha qarjy bólinbek. «Jumyspen qamtýdyń jol kartasy - 2020» baǵdarlamasy aıasynda alty birdeı nysandy kúrdeli jóndeýge 236,8 mln. teńge qaraldy. Atap aıtqanda, bir-birden bilim berý men densaýlyq saqtaý nysandary, Zelenov, Qaztalov, Terekti aýdandarynda jol jóndeý boıynsha tórt joba qarjylandyryldy. Oǵan qosa qurylysy bastalǵan nysandardy salýǵa 204 mln. teńge jumsalmaqshy. Sessııada Elbasy Jarlyǵyna sáıkes oblys ákimi Altaı Kólginov depýtattar aldynda esep berip, táýelsizdigimizdiń 25 jyldyǵy toılanatyn bıylǵy jyldyń on aıynda óńirdiń áleýmettik-ekonomıkalyq damýynda oń kórsetkishter bar ekendigin atap kórsetti.