Foto: Qarjy mınıstrligi
Júrgizilgen monıtorıng nátıjesinde bastapqy dılerler retinde SentrKredıt Banki, Eýrazııalyq Bank, Kaspi Bank, ForteBank jáne Qazaqstan Halyq Banki belgilendi. Atalǵan qarjy ınstıtýttary naryqta jańa júıe boıynsha jumys isteıtin bolady.
Jańa modelge sáıkes, bastapqy dılerler memlekettik baǵaly qaǵazdarǵa turaqty suranysty qamtamasyz etedi jáne qaıtalama naryqta ekijaqty baǵa belgileý mehanızmin qoldap, ashyq ári ótimdi baǵa qalyptastyrýǵa jaǵdaı jasaıdy.
Sonymen qatar, naryqtyń basqa qatysýshylary úshin qaıtalama naryqtaǵy memlekettik baǵaly qaǵazdarmen mámileler jasaý múmkindigi tolyq ári kedergisiz saqtalady.
Jańa júıeniń engizilýi arqyly ótimdilikti arttyrý, spredterdi taryltý, baǵa belgileýdiń turaqtylyǵyn kúsheıtý jáne ınvestısııalyq operasııalardy jeńildetý kózdelip otyr. Bul ınvestorlar úshin naryqty neǵurlym boljamdy ári tartymdy etedi.
Sarapshylardyń pikirinshe, bul joba naryqtyq ótimdilikti edáýir arttyryp, ınvestorlar bazasyn keńeıtýge múmkindik beredi. Sonymen qatar, memlekettik oblıgasııalardyń halyqaralyq tartymdylyǵy ósip, olardy JPMorgan GBI-EM sııaqty jahandyq ındeksterge engizýge jol ashylady.
Bul óz kezeginde úkimettiń qaryz alý shyǵyndaryn azaıtýǵa jáne qarjy naryǵynyń tıimdiligin arttyrýǵa yqpal etedi.
Qarjy mınıstrligi men Ulttyq Bank ishki qaryz naryǵyn damytýǵa baǵyttalǵan reformalardy kezeń-kezeńimen jalǵastyryp, onyń ashyqtyǵy men turaqtylyǵyn kúsheıtýge basymdyq beretinin atap ótti.
