Foto: Polisia.kz
Jyl basynan beri Qazaqstannyń quqyq qorǵaý organdary izdestirip júrgen 80 adam shetelde anyqtalyp, onyń 47-si ustaldy.
Sonymen qatar respýblıka aýmaǵynda shet memleketterdiń bastamasymen izdeýde júrgen 371 adamnyń júrgen jeri anyqtaldy. Olardyń 107-si qolǵa tústi.
Semeıde týystarynyń úıine qarý asynyp barǵan er adam ustaldy
Astanada krımınaldyq polısııa qyzmetkerleri asa iri kólemdegi alaıaqtyq isi boıynsha memleketaralyq izdeýde júrgen kúdiktini ustady. Tergeý málimetine sáıkes, ol Almaty qalasynda turǵyn úı keshenin salý syltaýymen úleskerlerdiń aqshasyn zańsyz ıemdengen. Keltirilgen shyǵyn kólemi shamamen 1,5 mıllıard teńgeni quraıdy.
Almatyda Qazaqstan Respýblıkasy IIM Interpol ulttyq ortalyq bıýrosynyń suraýy boıynsha Horvatııanyń quqyq qorǵaý organdarymen halyqaralyq izdeýge jarııalanǵan shetel azamaty ustaldy. Ol aqsha jymqyrý jáne ony zańdastyrýmen aınalysqan qylmystyq topty uıymdastyrdy degen kúdikke ilingen. Aldyn ala málimet boıynsha keltirilgen shyǵyn kólemi shamamen 30 mıllıon eýrony quraıdy.
Shıelide kanaldan máıiti tabylǵan qyzdyń ólimine kúdikti ustaldy
Tbılısıde Qazaqstan IIM-niń suraýy boıynsha halyqaralyq izdeýde júrgen Qazaqstan azamaty ustaldy. Qazirgi ýaqytta ony elge ekstradısııalaý máselesi qarastyrylyp jatyr. Ol avtokólik satý barysynda birneshe alaıaqtyq áreket jasap, jábirlenýshilerge 118 mıllıon teńgeden astam shyǵyn keltirdi degen kúdikke ilingen.
Moldova aýmaǵynda Qazaqstannyń quqyq qorǵaý organdarynyń bastamasymen halyqaralyq izdeýde júrgen shetel azamaty ustaldy. Tergeý málimetinshe, ol Qaraǵandy oblysyndaǵy esirtki zerthanasynyń qyzmetin krıptovalıýta aýdarymdary men messendjerler arqyly úılestirip, qarjylandyrǵan. Buǵan deıin atalǵan zerthana joıylyp, zańsyz aınalymnan esirtki zattary, jabdyqtar jáne prekýrsorlar tárkilengen bolatyn.
Ishki ister mınıstrligi qylmystyq jaýapkershilikten jasyrynyp júrgen adamdardy anyqtaý, izdestirý jáne ustaý jumystaryn el aýmaǵynda da, shetelde de jalǵastyrady.
Aıta keteıik, UQK Shekara qyzmeti 2026 jylǵy mamyrda quzyrly organdarmen birlesip, Qazaqstan zańnamalaryn buzǵan 3 881 adamdy ustady. Olardyń ishinde 1 125-i – shetel azamattary.
