Foto: Polisia.kz
Polisia.kz málimetinshe, memlekettik shekaradaǵy 48 avtokólik ótkizý ornynda patrýldik polısııanyń 59 beketi jumys isteıdi. Janar-jaǵarmaıdy zańsyz tasymaldaý faktilerin, onyń ishinde jol talǵamaıtyn kólikterdi paıdalaný arqyly júzege asyrylatyn áreketterdi anyqtaý-toqtatý boıynsha sharalar qabyldanyp jatyr. Shekara mańynda ornalasqan Jambyl, Túrkistan jáne Mańǵystaý oblystaryna erekshe nazar aýdarylyp, qosymsha sharalar qolǵa alynǵan.
Sonymen qatar avtokólikterdi zańsyz qaıta jabdyqtaýmen aınalysatyn, qajetti tirkeý jáne ruqsat qujattarynsyz jumys isteıtin tehnıkalyq qyzmet kórsetý stansııalarynyń qyzmetin anyqtaý jumystary júrgizilip jatyr.
«Mysaly, Qordaı aýdanynyń Qordaı aýylynda polısııa qyzmetkerleri memlekettik kirister organdarynyń ókilderimen birlesip, qosymsha janarmaı baktaryn ornatýmen aınalysatyn 16 tehnıkalyq qyzmet kórsetý stansııasyn tekserdi. Nátıjesinde 6 nysan ıesine qatysty ákimshilik materıaldar jınaqtaldy. Sońǵy bir aıdyń ózinde polıseıler 12 tonna janar-jaǵarmaıdy zańsyz áketýdiń jolyn kesti. Qaıta jabdyqtalǵan janarmaı baktary bar 54 avtokólik anyqtalyp, olardyń ıeleri ákimshilik jaýapkershilikke tartyldy», delingen habarlamada.
Munaı ónimderi men janar-jaǵarmaıdyń el aýmaǵynan zańsyz shyǵarylýyna jol bermeý jumystary Ishki ister mınıstriniń turaqty baqylaýynda tur.
Eske salaıyq, buǵan deıin shekarada 60 mln teńgeniń janar-jaǵarmaıynyń zańsyz tasymalynyń joly kesilgeni týraly habarlaǵan edik.
