Atamekendi ańsaǵan áýen

azat elde shyrqalǵanyna 25 jyl toldy Almatyda kún saıyn túrli mádenı sharalar ótip jatady. Alaıda keshe keshkisin Stýdentter saraıyn dúbirletken «Kósh jáne kóshbasshy» óner dýmanynyń orny bólek boldy. Ol  «Qamshy» aqparattyq agenttigi men «Qazaqstan» ulttyq telearnasy uıymdastyrǵan shara edi. Osynaý saltanatty sharaǵa  Aqparat jáne kommýnıkasııalar mınıstri Dáýren Abaev qatysyp, quttyqtaý sózin aıtty: – Ardaqty aǵaıyn, qadirmendi baýyrlar! Táýelsizdik jyldaryndaǵy oqıǵalardyń biri men biregeıi shet jurtta júrgen qandastarymyzdyń atajurtqa oralýy ekeni belgili. Osynaý tarıhı oqıǵanyń bastaý alǵanyna búgin týra 25 jyl toldy. 1991 jyly 18 qarashada Memleket basshysynyń bastamasymen sheteldegi qazaqtardyń elge oralýyn qamtamasyz etetin qaýly qabyldandy. «Qudaıǵa shúkir, óz bıligimiz óz qolymyzǵa tıdi. Atamekenge kelemin degen aǵaıyndy ata-baba arýaǵy aldan jarylqasyn!» degen Memleket basshysynyń sózi Uly kóshke qozǵaý saldy. Taǵdyrdyń jazýymen álemge tarydaı shashyraǵan baýyrlarymyz osy kezden bastap atajurtqa bet túzedi. Sodan beri 25 jylda qarashańyraqqa oralǵan qandastar sany 1 mıllıonǵa jetti», – dedi mınıstr. Uly kóshtiń shejiresine az-kem toqtalǵan mınıstr, 2015 jyly elge 5 myńǵa jýyq qandasymyz kóship kelse, tek ústimizdegi jyldyń 9 aıynda 24 myń adam oralǵanyn atap ótti. – Aldaǵy ýaqytta da kóship keletin aǵaıyndardyń sany arta beretin bolady. Osynyń barlyǵy sanaýly kúnnen keıin 25 jyldyǵyn atap ótetin Táýelsizdigimizdiń jeńisi. Memleket basshysy aıtqandaı, bul qadam jańylmaıdy, shekara jabylmaıdy. Uly kósh jalǵasa beredi, – dedi Dáýren Abaev. Ult birligi men «Máńgilik El» ıdeıa­syn júzege asyrýdy murat tutqan mádenı sharada kóńil kóterýden góri, taǵdyrǵa táýbe aıtý, táýelsizdik bederindegi buralań kezeń, atajurtqa at basyn tiregen aǵaıynnyń tolqy­nysty estelikteri basym túsip jatty. Árbir ánnen keıin ekrandaǵy áserli kórinister «Qazaq kóshiniń» shejiresin kóz aldymyzǵa ákeldi. Sıýjetterden Uly kóshtiń basynda turǵan Mustafa О́ztúrik, Halıfa Altaı sııaqty tulǵalar bastaǵan baýyrlardyń týǵan jerdiń topyraǵyn qusha jyǵylýyn kórgende áserlenbeý múmkin emes-ti. Qazaq pen qazaqty baýyrlastyra túsken osynaý bastamaǵa muryndyq bolyp júrgen «Qamshy» aqparattyq agenttiginiń jetekshisi Bilál Qýanysh: «Bul sharany biz ne úshin ótkizdik? Biz –  atamekenimiz Qazaqstanǵa keldik. О́stik! О́ndik! Osyny pash etkimiz keldi. Eńbegimiz aqtaldy dep oılaımyn. Halyq dán rıza. Bul sharany – «Qazaq kóshiniń» 25 jylyna tarıhı baǵa berý jáne qarashańyraqqa ýyq bolyp qadalǵan mıllıonnan astam qazaqtyń El men Elbasyna alǵys aıtýy dep qabyldaǵan jón. Alǵysty tek jalań sózben ǵana emes, elge kelip ósip-óngen, jetistikke jetken aǵaıynnyń jarqyn bet-beınesimen kórsetkimiz keldi. Konsert aıaqtalǵannan keıin de kózine jas alyp júrgen adamdardy kórip, bul bastamany beker qolǵa almaǵanymyzdy sezindik. Konserttiń eń bir áserli tusy Qýanysh Altybaevtyń Aqtamberdi jyraýdyń maqamyna salyp oryndaǵan «Táýelsizdik tolǵaýymen» aıaqtalýy boldy. Tyńdarman janyn tebirentti»,  – dedi. Aqıqatynda talaı aǵaıynnyń janyn tebirentip, saǵynyshtaryn terbegen bul konsertte elimizge qandastarymyz ǵana emes, rýhanı baılyǵymyz, ónerimiz, tipti ánderimizdiń, keıingiler estimegen jyrlardyń da oralǵanyn kórdik. Oıǵa oı, aqylǵa aqyl qosylǵanyn sezdik. Alystan kelgen aǵaıynnyń da, osyndaǵy qandastardyń da sanasyndaǵy bir tilek – eldiń amandyǵy bolsa, sol án men kúı tilimen áýelep jatty. Sahnada saltanat qurǵan Maıra Muhammed, Ramazan Stamǵazıev, «Qońyr» toby, «Alashuly», Shaba Ádenqul syndy óner sańlaqtary men estradalyq toptar kópshiliktiń kóńilin bir kónshitip tastady. Sol sııaqty Muratbek Sarbasov, Ibragım Eskendir, kúıshi Erkin Ergen, Bıbigúl Qılymhan, О́zgeris Sherikbaı, Aınur Qajımolla, Qýanysh Altybaevtardyń óneri de bárimizdi rıza qyldy. Osynaý óner – qazaq mádenıeti qorjynynyń baıyta tússe, onda «Kóshi-qon» saıasaty aıryqsha ról at­qar­ǵanyn barshamyz moıyndaı­myz. Bul az desek,  shetelde ómir sú­rip jatqan qazaqtar Qazaqstanmen kór­shiles shekarada turyp jatqandyqtan olardyń arasyndaǵy aqyn-jazýshylar, ǵalymdar atamekenge qur qol kelmedi. Bul Qazaqstan úshin úlken rýhanı demeý ekenin eshkim joqqa shyǵara almaıdy. Tipti baǵaly jádigerler, qymbat muraǵattar, qundy buıymdar da elge bet burǵan qazaq­tyń qorjynymen atajurtqa kelip jatyr. Ekonomıkalyq ósim­ge qosqan úlesteri óz aldyna. Son­dyqtan da taqyryptyq konsertke jınalǵan jurtshylyq muny qatar­daǵy kóp sharanyń biri dep sanamady. Bul – konserttiń aıasy joǵary, oıyn-saýyq deńgeıinen bıik, ıaǵnı Táýel­sizdik jyldarynda atajurtqa qonys aýdarǵan qandastarymyzdyń keýdesindegi qýanyshy edi. Aınash ESALI, «Egemen Qazaqstan» ALMATY