Qyzylorda oblysynyń Aral aýdanynda jas kásipker shyny plastıkten eskekti qaıyq shyǵaratyn kásipkoryndy iske qosyp, óndiristi jónge qoıdy, dep habarlady
QazAqparat.
Osydan eki jyl buryn kásipker Janserik Nysanbaev «Bıznestiń jol kartasy 2020» memlekettik baǵdarlamasynyń tıimdiligin paıdalana otyryp, korpýsty qatqyl jıhaz shyǵaratyn seh ashqan bolatyn. Búginde ol kásibin keńeıtip qana qoımaı, ony ártaraptandyrýǵa múmkindik alyp otyr. Naqty aıtqanda «Qazaqstan halyq bankinen» 13,5 mln teńge nesıe rásimdep, «Damý» Qorynyń 44 paıyzdyq kepildendirýimen jańa jobany júzege asyrdy.
«Aral aýdanyndaǵy halyqtyń negizgi qyzmeti balyq sharýashylyǵy bolǵandyqtan, qaıyqqa degen suranys únemi joǵary deńgeıde. Sondyqtan da biz aıyna 3 qaıyq jasap shyǵarylýdamyz. Jıhaz jasaý salasynda tájirıbem bolǵandyqtan, men shyny plastıkten qaıyq jasaý týraly ǵalamtordan alǵan málimetterdi tez uǵyndym. Belgili bolǵandaı, ádisin tapsań, sapaly qaıyqty jasaý asa qıyn emes eken. Shyny plastıkten shyqqan qaıyqtar óte jeńil, biraq myqty bolyp keledi. Olardy aǵash pen metalldan jasalǵan qaıyqpen salystyrǵanda áldeqaıda kóp merzim paıdalanýǵa jaraıdy», – deıdi kásipker Janserik Nysanbaev.
О́ndiristi keńeıtýdiń nátıjesinde kásipker qosymsha 3 jańa jumys ornyn ashyp, qaramaǵyndaǵy jumysshylar sanyn 10-ǵa jetkizdi. Shaǵyn kásiporyn tek joǵary sapaly ónim shyǵarýǵa baǵyttalǵan, sondyqtan da jasalý kezinde árbir tetigine asa mán beriledi. Janserik Nysanbaevtyń aıtýynsha, myqtylyǵy men sapalylyǵy eskerilip, qaıyqtyń baǵasy qoljetimdi deńgeıge sáıkestendirilgen.
Aıta keteıik, jas kásipker kásipornyna qosymsha qarjy tartý maqsatynda «Damý» Qorynyń kepildigimen EDB nesıe alý úshin qujattar jıynyn daıyndaý ústinde. Nesıe qarajatynyń kómegimen ol motorly qaıyq shyǵarýdy jáne óndiris kólemin arttyrýdy qolǵa almaqshy.
