Barymyzdy baǵalaı bileıik

Elbasynyń «Uly Dala ulaǵattary» atty eńbegin «Egemen Qazaqstanda» jarııalanyp júrgen úzindilerin úzbeı oqyp kelemin. El Táýelsizdiginiń alǵashqy jyldarynan ár salada oryn alǵan jaǵdaılar jalpylama demesek, bári birdeı kópshiliktiń esinde saqtalýy qıyn. Al Prezıdent sonyń bárin sanasyna túıip, qoıyn kitapshasyna túrtip otyrǵandaı túgendegen eken. Bir adam sonyń bárin qalaı oılap, paıymdap, basqaryp otyrady eken dep eriksiz tańǵalasyń. Nursultan Ábishulynyń qaı sózi de kókeıge qonymdy. Maǵan, ásirese, ol kisiniń óner salasyna, rýhanı qundylyqtarymyzǵa qatysty aıtqan oı-tujyrymdary erekshe áser etti. «Eger biz memleket bolyp turǵymyz kelse, ózimizdiń memlekettigimizdi uzaq ýaqytqa meńzep qurǵymyz kelse, onda halyqtyń rýhanııatynyń bastaýlaryn túsingenimiz jón», – deıdi Prezıdent. Sonaý toqsanynshy jyldardaǵy ótpeli kezeńderde óner salasy ógeı balanyń kúıin keshkeni jasyryn emes. Basqasyn aıtpaǵanda, sahnalar qańyrap, daryndy jandar bazar jaǵalap ketti. Biraq sonyń ózinde memleketimiz mádenıet pen ónerge qoldaý kórsetýdiń amaldaryn taýyp, bas kóterer azamattar rýhanı dúnıelerden ajyrap qalmaýymyzǵa dáneker boldy. Elbasy jazǵandaı, qoǵamnyń demokra­tııalyq úrdisterin áýelgi kezde dabyra daý-damaıǵa, keıinnen sypyra saıası saýdagerlikke salyp, odan soń «bara jatqannyń baltasyna, kele jatqannyń ketpenine» jabysýmen syndarly pikirtalastyń synyn ketirip, shyraıyn buzǵan kezi de boldy. Biraq óner birjola toqyraǵan joq. Barǵan saıyn tynysy ashylyp, órisi keńip, qazir rýhanı dúnıelerimiz maqtanyshpen aıtýǵa bolarlyqtaı deńgeıde. Rýhanı jutańdyq qoǵam bolmysyn da azdyratyny aqıqat. «Memlekettiń damýy – rýhanı áleminiń damýymen tikeleı sabaqtas. Adamnyń estetı­kalyq jáne etıkalyq talǵamy qatar ósken jaǵ­daıda, eldiń de zerde-zeıini tolyǵyp, qoǵam­nyń moraldyq kelbeti kemeldene túsedi. Qoǵamnyń taza kóńili osy kezde óziniń boıyn­daǵy talǵamnyń talapqa tolyqtaı jaýap be­rýine jol ashyp, ulttyń ózin ózi taný jaǵ­daıy jańa beles­terge kóteriledi. Zııaly qaýym­nyń ýaqyt aldyndaǵy jaýapkershiligi artyp, má­denıet qaıratkerleriniń ar tazalyǵy men jan ta­zalyǵy aldyńǵy orynǵa shyǵady. О́ner sonda qanatyn keńge jaıady», – dep jazypty Nur­sultan Ábishuly. Aqıqaty sol! Eń aldymen adamnyń rýhanı álemi, jany taza bolýy kerek. Keleshek urpaqty bıik adamger­shilik uǵymdarǵa, kisilik kelbetin saqtaı bilýge úıretý qajet. Memleket basshysy osy oraıda ónerdegi jas urpaqqa da sóz arnaǵan eken. «О́nerde júrgen jas óren, ór bol, biraq keń bol. Eń bastysy, kirshiksiz taza bol. О́nerge ózimshildik te, kúndestik te qaýipti. Janyń jaıdary, jarasymyń ıbaly bolsyn. О́nerdegi básekelestik ishtarlyq pen qyzǵanshaqtyqqa boı aldyrmasyn. Mundaı derttiń de óner salasynda kezdesip qalatyny shyndyq. Ozsań – ónerińmen oz, talantyńmen tanyl, darynyńmen daralan. Qur elikteý men sergeldeń solyqtaýdan saq bol», – deıdi Ult Kóshbasshysy. О́ner mektepterinde kór­nek­ti tusqa jazyp qoıatyn amanat sóz. О́z má­de­nıetimiz ben ónerimizge, ulttyq qundy­lyq­tary­myzǵa ózimiz, sońymyzdan ergen urpaq­­tarymyz qamqor, janashyr bolmasaq, basqa kimge kerek?! Barymyzdy baǵalaı bileıik te. Rymbala OMARBEKOVA, Qazaqstannyń eńbek sińirgen qaıratkeri, QARAǴANDY