UBT-nyń jańa formatynyń erekshelikteri qandaı?

Úkimette Premer-Mınıstr Baqytjan Saǵyntaevtyń tóraǵalyǵymen ótken otyrysta Bilim jáne ǵylym mınıstri Erlan Saǵadıev UBT-nyń jańa formatynyń erekshelikteri týraly baıandady. E.Saǵadıevtiń aıtýynsha, mınıstrlik qorytyndy attestasııalaýdy bólý jumystaryn júrgizgen. Endi túlekter mektepti bitirý synaǵyn jáne JOO-ǵa qabyldaý emtıhany retinde UBT tapsyrady. Mekteptegi qorytyndy attestasııa 5 pánnen turady, onyń 4-ýi mindetti, 1 pán - tańdaý boıynsha. UBT JOO-ǵa qabyldaý emtıhany jáne memlekettik granttardy bólý júıesi retinde saqtalady, biraq onyń formaty ózgeredi. Buryn 5 pánnen 125 suraq berilip, onyń ishinen 4 pán boıynsha 100 suraq esepteletin. Al 2017 jylǵy UBT formatynda 120 suraq qarastyrylyp, barlyǵy esepteledi. Keıbir suraqtardyń jaýabyna 2 ball beriletindikten, eń joǵarǵy kórsetkish – 140 balǵa teń. Saýaldar 5 pánnen qoıylady, olardyń 3-i mindetti, 2-ýi talapker josparlaǵan JOO-daǵy mamandyqqa baılanysty beıindik pán bolady. Testileý ýaqyty da ózgermeıdi – 3 saǵat 30 mınýt. О́tý baly da ózgergen joq - 50 ball. 2017 jyly UBT 20 maýsym men 1 shilde aralyǵynla ótedi, sondaı-aq túlekterge ony 2017 jyldyń tamyzy men 2018 jyldyń qańtarynda qaıta tapsyrýǵa múmkindik beriledi. Bir aıta keterligi, UBT beıindik pánderi 20 saýal men onyń bes túrli jaýap nusqasynan turady. Sonymen qatar, túlekterge 10 tapsyrma berilip, onyń kóptegen jaýaptarynyń ishinen durystaryn tańdaý usynylady. Beıindik pánderdi testileýdegi jaýaptardyń birneshe nusqasynyń bolýy talapkerdiń naqty taqyrypty qanshalyqty jaqsy biletindigin tekserýge múmkindik beredi. Sondaı-aq birneshe jaýap nusqasy arqyly testileý jaýaptardy kezdeısoq belgileýdi boldyrmaýǵa kómektesedi. Arnur Asqarov, "Egemen Qazaqstan".