Jylý berý máselesi Úkimet nazarynda

Búgin Úkimet otyrysynda Premer-mınıstr Baqytjan Saǵyntaev oblys ákimderine jylý berý maýsymyn turaqty baqylaýda ustaýdy tapsyrdy. «Bıylǵy jyly qarasha aıy jyldaǵydaı emes, ári aıazdy, ári qarly bolyp tur. Ońtústikte qar kóp, soltústikte aıaz qatty erekshe kúsheıdi. Osyǵan baılanysty birqatar óńirlerde jylý qazandyqtary isten shyǵyp, turǵyn úıler men áleýmettik nysandarǵa jylý berý máselesi toqtap tur. Jylý berý máselesin Úkimettiń birqatar keńesterinde qaradyq. Ákimdikter tarapynan daıyndyq barysy oıdaǵydaı dep aıtylǵan bolatyn. Biraq soǵan qaramastan joǵaryda aıtylǵandaı jaǵdaılar bolyp jatyr», dedi Úkimet basshysy. Osy kúnderdegi qatty aıazdyń saldarynan keıbir óńirlerde apattyq jaǵdaılar oryn alǵan. Otyrysta ákimder olardyń bári qalpyna keltirilgendigin habarlady. Sondaı-aq, qazirgi ýaqytta jaǵdaıdy qatań baqylaýda ustap otyrǵandaryn jetkizdi. «Qys endi bastalyp jatyr. Jylý berý maýsymyn turaqty baqylaýda ustaý kerek», dep tapsyrdy B.Saǵyntaev. Dınara BITIKOVA, "Egemen Qazaqstan"