Almatyny qardan tazalaýǵa qosymsha 400 mln bólinbek

Búgin Úkimettiń selektorlyq rejimdegi otyrysynda Almaty qalasynyń ákimi Baýyrjan Baıbek shahardy qardan tazartýǵa jergilikti bıýdjetten qosymsha 400 mln teńge bólinetinin jetkizdi, dep habarlaıdy QazAqparat. Úkimet otyrysynda sóz alǵan Baýyrjan Baıbek: «Qarashanyń 16-20-sy aralyǵynda qalaǵa jaýǵan qardyń qalyńdyǵy 60-tan 80 santımetrge deıin jetti. Bul ortasha aılyq normadan úsh esege artyq. Osyny eskere otyryp, qala kóshelerin qardan tazalaý jumystary kúsheıtilgen rejimde júrgizilýde. Tolyqtaı alǵanda, qar tazalaý jumystaryna qalanyń barlyq kommýnaldyq sharýashylyqtary, Tótenshe jaǵdaılar departamenti, Energetıka basqarmasy, aýdan ákimdikteri kúni-túni jumyldyryldy», – dedi. Onyń aıtýynsha, kún saıyn qar tazalaý jumystaryna 760-tan astam  tehnıka men 1600-den astam jumysshy jumyldyrylýda. «Buǵan qosa, qosymsha qala kásiporyndarynyń 128 tehnıkasy men 5 myńǵa deıin adam tartyldy. Eń birinshiden, joldardy, áleýmettik-ákimshilik nysandardy, adamdar kóp jınalatyn áýejaı, vokzal, saýda ortalyqtary, bazarlar mańyn qardan tazartý sharalary qolǵa alynýda», – dedi qala ákimi. Sonymen qatar, ol qala kóleminiń úlkendigine jáne irleges jaqtan eldi mekenderdiń kóptigine baılanysty qardy dalaǵa shyǵarý barysynda qıyndyqtar týyndap otyrǵandyǵyn da atap ótti. Ákimniń sózine súıensek, Almatyǵa sońǵy 4 táýlikte 95 myń tekshe metr bolatyn qar jaýǵan. Bul ótken qysta túsken qardan áldeqaıda kóp.