Teńizbaevqa Beıjiń Olımpıadasynyń kúmis júldesi berildi

Nurbaqyt Teńizbaevqa resmı túrde Beıjiń Olımpıadasynyń kúmis júldesi berildi, dep habarlaıdy QazAqparat. Bul týraly unitedworldwrestling.org halyqaralyq saıtynda jarııalandy. Osydan biraz kún buryn «grek-rım kúresi boıynsha qazaqstandyq balýan Nurbaqyt Teńizbaevqa 2008 jyly Beıjiń Olımpıadasynyń kúmis júldesi berilýi múmkin» dep barlyq aqparat quraldary súıinshilep jazdy. Alaıda, balýannyń ózi bul máselege baılanysty: «Qurmetti dostar! Beıjiń Olımpıadasy men úshin sporttyq mansabymnyń shyńy boldy. Árbir sportshy Olımpıada oıyndarynyń jeńimpazy nemese júldegeri bolǵysy keletini anyq. Sportta uzaq ýaqyt júrip, eshqashan jeńildiń astymen aýyrdyń ústimen júrgendi qoldamaıtynmyn jáne qoldamaımyn da. Qandaı medal bolsyn, ony kilem ústinde jeńip alǵandy qoldaımyn. Dál sol kúni, meni Ázerbaıjan balýany Vıtalıı Ragımov utqan bolatyn, Vıtalııdi talantty da myqty balýan retinde tanımyn. Sol kúni úshinshi oryn ıelený meniń mańdaıyma jazylǵan bolar, maǵan ózimniń utqan qola medalym asa qymbat. Kúmis Vıtalııge jáne onyń januıasyna tıesili. Ol medaldyń artynda kóptegen adamnyń eńbegi jatyr. Kúmis sol eńbektiń jemisi dep oılaımyn! Sizderdiń jyly lebiz jáne qoldaýlaryńyzǵa úlken alǵys aıtamyn», - dep málimdegen bolatyn. Biraq, Teńizbaevtyń qarsylasy Vıtalıı dopıng qoldanǵany úshin medalinen aıyrylyp, esesine HOK onyń júldesin Olımpıadada úshinshi oryn alǵan qazaqstandyq balýannyń enshisine jazdy.