Ofıserler de «jylaıdy»

Keshe Qazaqstan prezıdenttiginen úmitker Ǵanı Qa­­symov Almatydaǵy 28 pan­fılovshylar saıaba­ǵyn­da Uly Otan soǵysynda qaza tapqan bozdaqtarǵa ar­nalǵan Máńgilik alaý men Aýǵanstan jáne basqa elder aýmaǵynda áskerı is-qımyl kezinde qaza tapqan qa­zaq­stan­dyq jaýyngerler eskertkishine gúl shoqtaryn qoı­yp, tájim etti. Sol arada ol qazirgi kezde elimizdiń jastaryna beriler áskerı-patrıottyq tárbıeniń mán-mańyzyna toqtala kele, bul másele óziniń saılaý al­dyn­daǵy saıası tuǵyrnama­syn­da úlken oryn alatyndyǵyn aıtty. Biz óz tarıhymyzdy, erlik rýhymyzdy, elimizdi jaýdan qorǵaǵan, qyrshyn jastaı ketken bozdaqtarymyzdy umyt­paı, solardyń ónegesin ár­qa­shan esimizde ustaýymyz kerek. Sol surapyl soǵysta bizdiń áke­lerimiz ben atalarymyz jar­ty dúnıeniń azattyǵyn qorǵap qalǵan. Reseı prezıdenti ótken jyly bizdiń qazaqstandyq 100-shi jáne 101-shi brıgadalardyń soǵystaǵy erligine qurmetin bil­dirip, úlken kesene ornat­qa­ny tegin emes. Biz óz jas­ta­ry­myzdy osyndaı erlik dás­túr­le­rinde tárbıeleýimiz kerek. Son­daı-aq osy Uly Otan soǵy­sy­nyń, Aýǵanstan soǵysynyń jáne Otan qorǵaý oraıyndaǵy basqa da áskerı tapsyrmalardy oryndaǵan bir kezdegi ot keshken óreńderdiń qazirgi áleýmet­tik, zeınetaqylyq, turmystyq jaǵdaıy árdaıym bizdiń qo­ǵam­nyń, bıliktiń, Úkimettiń naza­rynda bolýy mindet, dep sabaqtady sózin úmitker. Budan keıingi áńgime Ofıserler úıinde, Zapastaǵy áske­rı qyzmetshiler odaǵynyń keń­se­jaıynda jalǵasty. Odaq tór­aǵasy, general-maıor Aıt­qa­lı Esenǵulov 30 myń adam­dyq otstavkadaǵy ofıserler qosyny Patrıottar partııasy­nyń jaqtasy ekendigin tilge tıek etti. A.Esenǵulovtyń, Damansk oqıǵasyna qatysýshy ofıser Vıktor Barsýkovtyń aıtýynsha, qazirgi tańda zapastaǵy áske­rı­lerdiń tirshilikke tireler túıt­kilderi az emes kórinedi. Olar­dyń zeınetaqylaryn avtomatty túrde ındeksasııalap turý, erek­she jaǵdaıdaǵy jumystary úshin ótemdik jeńildikter belgileý, ofıser mártebesin anyq­taı­tyn «Ardagerler týraly» zań áli kúnge qabyldanbaýy sheshilmegen máseleler qatarynda ataldy. Aýǵan soǵysynyń ardageri, zapastaǵy polkovnık Ju­majan Erǵalımov aýǵan soǵy­sy­na qatysýshylaryń mártebe­si áli kúnge aıqyndap anyqtal­maǵandyǵyna toqtaldy. Aýǵan­dyqtarǵa berilip otyrǵan je­ńil­dikter tym mardymsyz. Endigi bir túıtkildi jaǵdaı sol, ofıserler úıiniń mármár ǵımaraty qazir, shyntýaıttap kel­gende, ofıserlerge tıesili emes, áldebir aksıonerlik qo­ǵam­ǵa jalǵa berilipti. Ofıserler óz mereıtoılaryn, merekelerdi, jerleý rásimderin munda ótkize almaı, basqa mekeme­ler­diń tabaldyryǵyn tozdyrýǵa májbúr. Osy jáne joǵaryda atalǵan basqa da jaılardy prezıdenttikten úmitker Ǵanı Qasy­mov aldaǵy ýaqytta óz naza­ryn­da ustaıtyndyǵyn má­lim­dedi. Qorǵanbek AMANJOL. Almaty.