Astanada selfıge arnalǵan saıabaqtar paıda bolady

Elordada selfı jasaýǵa arnalǵan saıabaqtar paıda bolady. «Krysha» portalynyń aqparaty boıynsha,  selfı úshin arnaıy músinder qoıylǵan úsh jańa saıabaq salynady, dep habarlaıdy abctv.kz. Onyń alǵashqysy ári eń  úlkeni Jeńis dańǵyly men Jangeldın kóshesiniń qıylysynda bolady. Aýmaǵy – 3 myń sharshy metr. Dál osyndaı skver (aýmaǵy sál kishirek – 2 myń sharshy metr) Saryarqa dańǵylynyń boıynan da oryn tebedi. Ýchaskelerdiń úshten bir bóligi kógaldandyrylady. Qalǵan bóligine jol tóselip, oryndyqtar jáne túrli  qondyrǵylar qoıylady. Al saıabaq aýmaǵynda sýretke túsý úshin  bıikteý oryndar  qarastyrylǵaly otyr. Jobanyń mazmuny boıynsha,  bezendirýdiń taqyryby  mýzyka bolmaq.  Astana qalalyq tabıǵı resýrstar basqarmasynan jýyrda ǵana  saraptamadan ótken qujattamada selfı úshin kontrabas, roıal jáne taǵy basqa da  aspaptar qarastyrylǵan. Úshinshi saıabaq Moldaǵulova kóshesi boıynda Jeńis dańǵyly men Potanın kóshesi arasyndaǵy ýchaskede ashylady. Ol  kishkentaı balalardyń demalysyna laıyqtalyp jasalady.