Qasymov: Ýaqytsha tirkeýge baılanysty tekserýdiń basqa jolyn qarastyramyz

Ishki ister mınıstri Qalmuhanbet Qasymov ýaqytsha tirkeýge baılanysty esik ashpaıtyn qazaqstandyqtardy tekserýdiń basqa jolyn qarastyratynyn málimdedi. Úkimet otyrysynan keıin jýrnalısterdiń saýalyna jaýap bergen Qalmuhanbet Qasymov mınıstrlik ýaqytsha tirkeýden ótpegenderge aıyppul salýǵa áli kirispegenin aıtty. Sondaı-aq «Azamattyń úıge kelgen polıseıge esik ashpaýǵa quqyǵy bar ma?» degen suraqqa: «Jaraıdy, ashpańyzdar, biz tekserýdiń basqa amalyn tabamyz», – dedi. «Sebebin ózderińiz bilesizder, qazir Ýnıversıadany kútip otyrmyz. Sondyqtan 4 qańtarda jınalys ótkizip, qalada josparly túrde tekseris bastaldy. Alǵashqy aıda tek eskertý jasaýmen shektelemiz. Al odan keıin tıisti sharalar qoldanamyz. Ýaqytsha tirkeý – bul eń tıimdi joly. Máselen, qazir Astanada páter alý úshin kezekte turǵan adam jumyspen Atyraýǵa barýy kerek boldy delik, sonda ne isteýi kerek? Biz onyń turǵylyqty jerindegi tirkeýden shyǵarmaı, barǵan jerinde de tirkeýge turýǵa, jumys istep, páter alýǵa múmkindik beremiz» dedi mınıstr. Jaqynda bastalǵan tekseris Almatydaǵy Ýnıversıadaǵa baılanysty júrgizilgen. «Biz tek Almatyda tekseris júrgizdik, ol ýaqytsha tirkeý máselesine baılanysty emes, biraq ózge óńirlerde bul is júrgizilmedi. Almatyda zańsyz turyp jatqandardy tekseremiz» dedi Qasymov. Aıta keteıik, búgin Úkimet otyrysynda QR Premer-mınıstri Baqytjan Saǵyntaev tirkeý engizilgennen keıin halyqqa qyzmet kórsetý ortalyqtarynda uzyn-sonar kezektiń qalyptasqanyn, sondaı-aq jalpy tirkeýdiń halyq arasynda narazylyq týdyrǵanyn aıtty. Premer-Mınıstr tirkeýge qatysty suraqtardyń tym kóp ekenin jáne túsindirý jumystarynyń durys júrgizilmegenin de jetkizdi. Osyǵan baılanysty jańa bastamaǵa kóshpes buryn elektrondyq tirkelý júıesin ázirleý kerektigin málimdedi.