Májilis depýtattary BQO-da boldy

Májilis depýtattary Gúljan Qaraǵusova, Tatıana Iаkovleva jáne Amanjan Jamalov BQO-ǵa jumys sapary kezinde Zelenov aýdany aktıvimen, sondaı-aq Oral qalasynda «Kvant» JShS ujymymen kezdesti, dep habarlaıdy QazAqparat. Depýtattar Zelenov aýdany ortalyǵy Peremetnyı aýylyndaǵy Dostyq úıinde bolyp, osyndaǵy etnomádenı birlestikterdiń jumysymen tanysty. Aktıv jıynynda aýdan ákimi Kárim Jaqypov astyqty ári óndiristi óńirdiń áleýmettik-ekonomıkalyq damýyna toqtaldy. Májilis depýtattary Elbasy bastamasymen qolǵa alynǵan memlekettik baǵdarlamalardyń oryndalý barysy týraly áńgimelep, turǵyndardyń saýaldaryna jaýap berdi. Depýtattar G.Qaraǵusova, A.Jamalov, T.Iаkovleva sondaı-aq óńirge tanymal jıhaz shyǵarýmen aınalysatyn «Kvant» JShS qyzmetkerlerimen kezdesip, olardyń da usynys-pikirlerine den qoıdy. Májilis depýtaty Amanjan Jamalovtyń atap ótkenindeı, Elbasymyz shaǵyn jáne orta kásipkerlikke qoldaý kórsetýmen birge olar óndiretin ónim kólemin kóbeıtý mindetin qoıǵany belgili. Eger el ekonomıkasyndaǵy shaǵyn jáne orta kásipkerlik úlesi molaısa, túsetin salyq ta artady. Eń bastysy, kásiporyndar jańa tehnologııa negizinde óndiris turaqtylyǵy men óz jumys áleýetin saqtaı otyryp, halyqqa qajetti, sapaly ónim óndirýge baǵyt ustaýy tıis. «Aýdandar men Oral qalasyndaǵy kezdesýler kezinde aıtylǵan qundy usynys-pikirler Úkimetke deıin jetkizilip, jumys barysynda eskeriletin bolady», - dedi A.Jamalov.