Aqqýlar nege ólip jatyr?

Mańǵystaýda qyspen birge keletin qyzyq bar, ol – Kaspıı baýyryna aqshańqan aqqýlardyń ushyp kelýi. Bul – qala turǵyndary men qonaqtarynyń saǵyna kútip, qýana qarsy alatyn naǵyz jańalyqty sáti. Qoıý kók teńiz ústine sán bergen ıir moıyndy ádemi aqqýlardy uzaq qyzyqtap, múmkindigine qaraı sýretke túsip, olardy jaǵalaýdan tamaqtandyratyn turǵyndardyń kıeli qusqa qurmeti bólek. Biraq, qala turǵyndary Aqtaý qalasynyń halyq teńiz jaǵalaýyna eń kóp baratyn tusy – 14 shaǵyn aýdandaǵy jaǵadan óli aqqýlardy tapqan. Aqqýdyń biriniń jansyz denesi teńiz jaǵasyndaǵy tas ústinde jatsa, ekinshisi jaǵalaýdan onsha qashyq emes sý ishinde jatqan. Aqqýlar neden óldi, olardyń ólimine ne sebep? Másele áli anyqtalǵan joq. Turǵyndar aqqýlardy nanmen ǵana tamaqtandyratyn. Alaıda, 2014 jyly «Eko Mańǵys­taý» úkimettik emes uıymy atal­ǵan qustarǵa nan berýge bolmaıtyndyǵy, nannyń olardyń asqazanyna aýyrlyq túsiretini týraly eskertip, teńiz jaǵasyndaǵy adam kóp shoǵyrlanatyn oryn­dar­ǵa eskertpe taqtaılar ilgen bola­­tyn. Bul eskertpe halyq ara­syn­­da ártúrli pikir týdyrdy – qol­­da­­ǵan­­dar da, qarsy shyqqandar da boldy. Demalýshylardyń teńiz jaǵasyna qaldyryp ketetin qoqys-qaldyqtary qus tóresi – aqqýǵa oń áser etpeıtin sekildi. Qalaı bolǵanda da, aqqýdyń Aqtaýǵa jyldaǵydaı kóp emes, jyl sanap sırekteý keletini kóńil mazalaıdy. Aqtaýdan aqqýlar nege jerindi?!. Gúlaıym ShYNTEMIRQYZY, «Egemen Qazaqstan» Mańǵystaý oblysy