Laıyqtylar marapattalǵan saltanat

Búginde Ishki ister mınıstrligine qarasty Ulttyq ulannyń eldegi tynyshtyqtyń saqtalýyna qosyp kele jatqan úlesi zor. Ishki áskerdiń zańdy murageri bolyp tabylatyn quqyqtyq tártip áskeriniń qurylǵanyna kúni keshe shırek ǵasyr toldy. Táýelsizdikpen túıdeı qurdas kúshtik qurylymnyń ataýly kúnine oraı elorda tórinde saltanatty shara uıymdastyryldy. Qazaqstanda tuńǵysh ret quqyqtyq tártip áskeriniń qurylýy kezeńinde talmaı eńbek etken ardager azamattar men Ulttyq ulannyń jeke quramy qatysqan saltanatty jıynda laıyqtylarǵa syı-qurmet kórsetilip, úzdik mamandar marapattaldy. Aldymen Ulttyq ulannyń jıyrma bes jyldyq eńbegin ekshep, arnaıy baıandama jasaǵan Ulttyq ulan Bas qolbasshysynyń orynbasary, general-maıor Muhametqalı Satov aldaǵy naqty josparlar men alar asýlardy sóz etti. Sodan soń, memleketimizdiń ishki tynyshtyǵyn qamtamasyz etetin búgingi Ulttyq ulannyń qalyptasýynyń basynda turǵan generaldar men ardager ofıserler de Táýelsizdiktiń eleń-alańynda ásker qurýdyń qıyn shaqtaryn bir sát eske aldy. Atap aıtqanda, uzaq jyldar boıy Ishki áskerler qolbasshysy bolǵan qurmetti ardager, general-polkovnık Qaıyrbek Súleımenov pen general-leıtenant Bolat Janasaev Qazaqstannyń ishki ister organdary men Ulttyq ulan ardagerleri keńesiniń tóraǵasy mılısııa general-maıory О́mirzaq Bolsambekov jáne Ulttyq ulan ardagerler keńesiniń tóraǵasy general-maıor Qalıaqpar Toqyshev syndy salaǵa eńbegi sińgen ardagerler minberge shyǵyp, jıynǵa qatysýshylarǵa sóz arnady. Sondaı-aq, Ulttyq ulan án-bı ansam­bliniń súıemeldeýimen ótken jıynda Ulttyq ulannyń Bas qolbasshysy general-leıtenat Rýslan Jaqsylyqov birqatar azamattardy marapattady. Olardyń qatarynda merziminen buryn shen alǵandar men qyzmettik páter kiltine ıe bolǵandar da boldy. Qýanysh ıelerin quttyqtaǵan sózinde Rýslan Fatıhuly jaqyn kúnderi Almatyda shymyldyǵyn ashatyn XXVIII Búkilálemdik qysqy Ýnıversıada kezinde quqyqtyq tártipti qyraǵy qamtamasyz etý úshin Almaty garnızony jeke qura­mynan 1200-den asa áskerı qyzmetshi jumyldyrylatyndyǵyn tilge tıek etti. Sonymen qatar, elorda tórinde ótetin ha­lyq­aralyq EKSPO-2017 kórmesiniń qaý­ip­sizdigin qamtamasyz etýge de ulan­dyq­tardyń belsendi qatysatyndyǵyn jet­kizdi. Nurlybek DOSYBAI, «Egemen Qazaqstan» ASTANA