Meniń Dúısenbek degen synyptas dosym jumystan keıin «GAZ-21» kóligimen jolaýshylar tasıdy. Bir kúni kezekti klıenti retinde kóligine jas qyz otyrady. Kólik júrgizýshiniń qoly jıi-jıi bara beretin jyldamdyqty aıyrǵysh korobka rychagynyń joq ekenin baıqaǵan qyz «aǵa, mashınańyzdyń korobkasy qaıda?» dep suraıdy. Kaljyńbas dosym oǵan «oıboı, mana úıdiń janynda mashına jóndep jatqan jerimnen bireý shaqyryp alyp edi, asyǵyp júrip umytyp ketippin» degen eken. Birazdan soń ózine tańdanyp otyrǵan qyzdy aıap «bul avtokóliktiń rychagy mynaý» dep róldiń janyndaǵy rychagty kórsetedi. Qýanyp ketken qyz «e, báse, nege burylam degen sıgnaldy qosa beredi desem» degen eken.
«Ekeý emes, bir qoı»
Dúısenbektiń eki balasy úılengen. Birinshi kelini qazaq qyzy bolsa, ekinshi kelini slavıan ultynan. Sońǵy kelini bosanyp ul týady. Qýanǵannan atyn Kárim dep qoıady. Aqylbaı – synyptasymyzdyń ákesiniń aty. Dúısenbek jasy jetpisten asqan anasyna kelip, nemereli bolǵanyn, atyn Kárim dep qoıǵanyn aıtady. Sosyn, óziniń qýlyǵyna salyp, Kárimniń týǵanyna Aqylbaı qatty qýanyp, súıinshisine eki qoı beretin boldy deıdi. Bul sózdi shyn kórgen ańqaý anasy: – Eee, jaraıdy onysy, bizdiń kisi tyrash keledi, qýanǵasyn aıtqan ǵoı, – depti. Aqylbaı bolsa Dúısenbektiń kelini bosanǵanynan tipti beıhabar eken. Biraz kúnnen keıin estip, jomarttyǵynan sarańdyǵy basymdaý Aqylbaı «ekeý emes, bir qoı berem» depti.«Endi on jyl seni saǵynbaımyn»
Dúısenbek bir kúni jol ústinde kólik «aýlap» turǵan Nurbekti kezdestirip, mashınasyna otyrǵyzyp alady. Nurbek qyzyp alsa kerek, jol boıyna aýyzy jabylmaı, áńgime arasynda «men seni gúl etem» dep «ana jerge, myna jerge apar» dep áýreleıdi. Sóıtip, kesh túskende aýylǵa jetkizip salýdy suraıdy. Qurǵaq ýádeden ábden mezi bolǵan Dúısenbek aýylǵa Nurbekti jetkizip salady da, «kúni boıy júrgende qaryq qylmaǵan endi seni 10 jyl kórmesem de saǵynbaımyn» dep tastap ketedi. Dúısenbek bir-eki jyl ótken soń aldyńǵy aıtqanyn umytyp ketedi de, Kókshetaýda aýyldasyn kórip qalyp «Aý, Nurbek» dep shaqyrady. Izinen qýyp júrip janyna barǵan Dúısenbekke Nurbek «ári júr, ári júr áli 10 jyl ótken joq» degen eken. Jazyp alǵan Tóleý DÚISENBAI
