Ǵalymdar Halyqaralyq fýtbol federasııasy (FIFA) úzdik dep tanyǵan «Penang» klýbynyń jartylaı qorǵaýshysy Faız Sýbrı soqqan goldyń qupııasyn túsindirdi. Bul týraly vesti.kz habarlady.
Malaızııalyq fýtbolshyǵa Ferens Pýshkash atyndaǵy syılyq 9 qańtar kúni Shveısarııanyń Sıýrıh qalasynda ótken saltanatty keshte tabystalǵan.
Bul goldy 29 jastaǵy Sýbrı el chempıonatynda «Pahang» komandasyna shamamen 35 metr jerden belgilengen aıyp dobynan soqqan bolatyn. Onyń baǵyttaǵan soqqysy sózben aıtyp jetkizgisiz traektorııada ushyp, alys toǵyzdyqqa kirgen.
Ǵajaıyp gol fızıka zańymen túsindiriledi. Jyl golyn salý úshin malaızııalyq aıaqdopshyǵa «Magnýs áseri» kómektesken. Oǵan sondaı-aq, mundaı soqqy jasaý úshin aýa raıynyń qolaılyǵy men qaqpamen aradaǵy qashyqtyǵy da septigin tıgizipti.
Alǵash ret «Magnýs áserin» nemis fızıgi Genrıh Magnýs 1853 jyly jazǵan. Bul fızıkalyq qubylys aınalmaly deneniń suıyqtyq jáne gaz aǵyny kezinde aınalyp aǵýynan paıda bolady. Aınalmaly nysan óz ortasynda quıyn tárizdi qozǵalys jasaıdy. Nátıjesinde dene týra ushpaı, óz baǵytyn ózgertedi. Fýtbolshylardyń ásirese, aınaldyra soqqy jasaǵanynyń qupııasyn ǵalymdar osy qubylyspen túsindiredi.
