Sýretter: Salı Sabırov, Turar Qazanǵapov
Saltanatty rásim «Beauty in Action», qazaqshalasaq «Qozǵalystaǵy sulýlyq» tujyrymy aıasynda órbidi. Shoý sport, óner jáne tabıǵattyń ózara úılesimin pash etýge arnaldy. Sahnanyń negizgi elementi qozǵalysty beıneleıtin erekshe qurylym boldy. Ol Olımpıada ótken Alpi taýly aımaqtary men Italııanyń jazyqtaǵy qalalaryn baılanystyratyn nyshan retinde usynyldy. Qoıylym Verona fılarmonııalyq teatrynda da ótti.
Rásim barysynda jarystar aıaqtalǵannan keıingi birlikti bildiretin sportshylar sherýi ótip, qatysýshylar óz elderiniń baıraǵyn alyp shyqty. Aıta keterligi munda tý ustaýshy ókil jalpy delegattan bólek júrip ótti. Elimizdiń kók týyn Italııa tórinde mánerlep syrǵanaýshy Mıhaıl Shaıdorov ustap shyqty.
Djekı Chan, Gennadıı Golovkın jáne Mıhaıl Shaıdorov Mılanda kezdesti
Olımpıada komıtetiniń málimetinshe, jabylý saltanatynyń qoıylymyna 800-den asa ánshi, mýzykant jáne bıshi qatysty. Arnaıy kópdeńgeıli LED-sahna jasalyp, kostıýmder ıtalııalyq opera dástúrine saı tigildi. Uıymdastyrýshylar eriktilerdiń eńbegin, sondaı-aq sportshylardyń Olımpıadaǵa deıin júrip ótken uzaq ári qıyn jolyn aıryqsha atap ótti. Mádenı baǵdarlamada ıtalııalyq ánshi Akılle Laýro, aktrısa Benedetta Porkarolı, dıdjeı ári prodıýser Gabrı Ponte jáne ózge de ónerpazdar óner kórsetti. Álemdik balet juldyzy Roberto Bolle jetekshilik etken áserli horeografııalyq shyǵarma keshtiń erekshe sátteriniń birine aınaldy.
Úzdik ondyq: qazaqstandyq sportshylar 2026 jylǵy Olımpıadada úzdikter qatarynan kórindi
Kelesi qysqy Olımpıada oıyndaryn Fransııa qabyldaıdy
Dástúr boıynsha saltanatty rásimniń negizgi bóligi aıaqtalǵan soń Olımpıada týy túsirilip, kelesi qysqy Olımpıadany qabyldaıtyn Fransııa ókilderine tabystaldy. 2030 jylǵy Qysqy Olımpıada oıyndary osy memlekette ótedi. Sondaı-aq uıymdastyrýshy el aldaǵy dodanyń «Tań shýaǵy» atty tanystyrylymyn usyndy. Odan keıin ıtalııalyq sazger Lıýdovıko Eınaýdıdiń áýenimen Mılan men Kortınada janǵan 2026 jylǵy Olımpıada alaýy sóndirildi.
Aıta keteıik, Italııadaǵy qysqy Olımpıada oıyndarynda 18 altyn, 12 kúmis, 11 qola medalmen Norvegııa eli kósh bastady. 12 altyn, 12 kúmis, 9 qola júldemen AQSh quramasy ekinshi orynǵa jaıǵasty. Úzdik úshtikti 10 altyn, 7 kúmis, 3 qola ıelengen Nıderlandy sportshylary túıindedi.
Al elimiz 1 altyn medalmen jalpykomandalyq esepte 19-oryn aldy. Bul – 1994 jylǵy Lıllehammer Olımpıadasynan keıingi úzdik kórsetkish (12-oryn). Mılanda qorjynǵa jalǵyz júldeni mánerlep syrǵanaýshy Mıhaıl Shaıdorov saldy. Ol – sporttyń osy túrinen Olımpıada chempıony atanǵan tuńǵysh otandasymyz. Osyǵan deıin bul sport túrinen Qazaqstan qorjynynda tek qola júlde bolǵan. Atalǵan júldeni 2014 jylǵy qysqy Olımpıadada Denıs Ten salǵan edi.
