Semeı qalasynyń ákimi Ermak Sálimov Krasnyı Kordon yqshamaýdanyndaǵy aýlalaryn sý alǵan turǵyndarmen kezdesip, olardyń tilsiz jaýdyń tutqynynda qalǵan úıleriniń jaǵdaıymen tanysty. Aıta keteıik, ótken aptanyń sońǵy kúnderinde qalanyń jeke sektoryndaǵy birneshe úıdiń aýlasyn sý basqan bolatyn. Keıbir úılerdiń turǵyndary baspanalaryn tastap ta úlgergen edi.
Turǵyndardyń aıtýynsha, mundaı jaǵdaı alǵash ret bolyp otyrǵan joq. Olar buǵan sý júretin arnalardyń durys ári der kezinde tazalanbaýy sebep bolǵanyn aıtady. Keıbir turǵyndardyń sý arnalaryna qoqys tastaıtyny da jaǵdaıdy kúrdelendirip otyrǵan syńaıly.
«Sý basqan turǵyn úılerdi aralap shyqtyq. Jaǵdaı túsinikti bolǵan sekildi» degen qala ákimi tıisti oryndarǵa tez arada Qaraǵaıly, Korotkaıa, Dalnıaıa, Omskaıa, Grıshenko kóshelerindegi sý júretin aryqtardy muqııat tazartýdy tapsyrdy.
Qazir tótenshe jaǵdaıǵa baılanysty arnaıy jumys toby qurylyp, mán-jaıdy anyqtap jatyr.
Azamat Qasym, «Egemen Qazaqstan»
Shyǵys Qazaqstan oblysy.
