Oblystyq fılarmonııa ártisteri konsertti Bákir Tájibaevtyń sózine jazylǵan Turym Alakózovtyń «Álııa» rekvıemimen ashty. Odan keıin Ahmet Jubanovtyń horǵa laıyqtalǵan «Qarlyǵash», «Aq Sholpan», Ǵazıza Jubanovanyń Ábý Sársenbaevtyń sózine jazylǵan «Jalǵyz emen», «Daýyl», «Jeńeshe» ánderimen jalǵasty.
Keshte Ahmet Qýanuly men Ǵazıza Ahmetqyzynyń shyǵarmalarynan ózge qazaqstandyq kompozıtorlardyń týyndylary da oryndaldy. Kópshilik Aqtóbe oblysy óner salasynyń úzdigi Serik Jubatqannyń oryndaýyndaǵy Aqan seriniń «Mańmańgerin», Jambyl atyndaǵy Qazaq memlekettik akademııalyq fılarmonııasy Baqytjan Baıqadamov atyndaǵy memlekettik hor kapellasyny solısti Nazerke Abraly shyrqaǵan Shámshi Qaldaıaqovtyń ánderin jyly qabyldady.
«Búgingi konsert – bizdiń fılarmonııa men óńirlik mádenıet mekemeleri arasyndaǵy áriptestiktiń aıqyn kórinisi. Mundaı jobalar birlesken shyǵarmashylyq bastamalardy júzege asyrýǵa ǵana emes, kásibı turǵyda tájirıbe almasý úshin de kerek», deıdi Jambyl atyndaǵy Qazaq memlekettik akademııalyq fılarmonııasynyń dırektory, Qazaqstannyń eńbek sińirgen qaıratkeri Nurǵısa Dáýeshov.
Ǵazıza Jubanova atyndaǵy Aqtóbe oblystyq fılarmonııasy qazaq kameralyq horynyń kórkemdik jetekshisi, dırıjer Merbol Quspanovtyń aıtýynsha, joba klassıkalyq murany saqtaýǵa ǵana emes, hor ónerin óskeleń urpaq pen jastardyń akademııalyq mýzyka men ulttyq mádenı muraǵa qyzyǵýshylyqtaryn arttyra túsýge baǵyttalǵan.
«Almaty qalasynyń kórermenderine qazaq hor óneriniń úzdik úlgilerin usynyp, Ahmet Jubanovtyń qazaqtyń kásibı mýzykalyq mádenıetine qosqan jaýharlaryn taǵy bir márte kórsetý biz úshin úlken mártebe», dedi Aqtóbe oblystyq fılarmonııasynyń dırektory Dına Nııazova.
Konsert joǵary oryndaýshylyq sheberligimen, kórkemdik mánerliligimen jáne aıqyn ulttyq naqyshymen erekshelendi.
Almaty
