Volkswagen 600-den astam avtodılerge 1,21 mlrd dollar ótemaqy tóleıdi

AQSh federaldy soty nemistiń Volkswagen konserni amerıkalyq avtodılerlerge 1,21 mlrd dollar ótemaqy tóleıtinin rastady. Bul týraly bbc.com habarlady. «Kelisimshart boıynsha, kompanııa 18 aı ishinde 652 dılerdiń árqaısysyna ortasha eseppen 1,85 mln dollar tóleıdi», – delingen. Bul qarjy dıler-kompanııalardyń shyǵynyn ótep, kásibin ary qaraı jalǵastyrýǵa múmkindik berýi tıis. Jalpy alǵanda nemis korporasııasy avtomobıl ıeleriniń, ekologııalyq rettegish qyzmetkerleriniń, óńir bılikteriniń, sondaı-aq avtodılerlerdiń narazylyǵyn qanaǵattandyrý úshin shamamen 22 mlrd dollar tóleýge kelisip otyr. Aıta keteıik, 2015 jyldyń qyrkúıek aıynda Volkswagen-ge qorshaǵan ortaǵa taraıtyn qaldyqtardy azaıtyp kórsetetin qurylǵy ornatty degen aıyp taǵylǵan bolatyn. Osyndaı aqaýmen AQSh-tyń bir ǵana Nıý-Meksıko shtatyna 600 myń kólik satylǵan. Sodan beri osy másele boıynsha álemniń birqatar elderi tergeý jumystaryn júrgizip keledi. Máselen, Ońtústik Koreıa memleketi avtokonsernge 18 mlrd dollar kóleminde aıyppul salsa, ótken jyly Meksıkada 45,49 myń kólik ekologııalyq sertıfıkatsyz satylýyna baılanysty qorshaǵan ortany qorǵaý jónindegi federaldy prokýratýra jergilikti kompanııaǵa 9 mln dollar tóleýdi mindettedi.