Qazaqstandyqtar memlekettik organ jumysyn veb-portal arqyly baǵalaı alady

Qazaqstanda azamattardyń memlekettik organdardyń jumysy týraly aqparat alýyn arttyrý úshin júıeli jumystar júrgizilýde. Bul týraly QR Úkimeti otyrysynda QR aqparat jáne kommýnıkasııalar mınıstri Dáýren Abaev aıtty. D. Abaev azamattyq qoǵamnyń memlekettik sheshimder qabyldaý úrdisine syndarly qatysýynyń mańyzdy sharttarynyń biri olardyń memlekettik organdardyń qyzmeti týraly aqparattylyǵy bolyp tabylatynyn atap ótti. Osyǵan baılanysty ótken jyly qabyldanǵan «Aqparattyń qoljetimdiligi týraly» Zańnyń tolyqqandy júzege asýyn qamtamasyz etý boıynsha jumystar júrgizilýde. Birinshiden, búginde zań boıynsha negizgi normatıvtik baza qalyptastyrylǵan. Zańnyń júzege asyrylýyna qoǵamdyq baqylaýdy qamtamasyz etý maqsatynda Aqparatqa qoljetimdilik máseleleri boıynsha komıssııa qurylyp, jumys isteýde, onyń quramynda úkimettik emes sektor keńinen qamtylǵan. Ekinshiden, zań normalaryn túsindirý úshin halyq arasynda 2016 jyly memlekettik qyzmetkerlerge, jergilikti ózin-ózi basqarý organdarynyń ókilderine, ÚEU men jýrnalısterge arnalǵan semınarlar sıkli ótkizildi. Bul jumys bıyl da jalǵasyn tabady. Úshinshiden, aqparatqa qoljetimdilik týraly zań normalarynyń oryndalýyna monıtorıng júrgiziledi. Onyń nátıjeleri boıynsha memlekettik organdarǵa óz ınternet-resýrstaryn jaqsartý boıynsha sáıkes usynystar jasalady. Tórtinshiden, «Ashyq úkimettiń» bes ınternet-portalyn tehnıkalyq qamtamasyz etý boıynsha aýqymdy jumystar júrgizilýde. Máselen, búginde «Ashyq NQA» portalyna 7,5 myńnan astam qujat ornalastyrylǵan, onyń ishinde zań jobalary men memlekettik qyzmetterdiń standarttary bar. Bul portalda normatıvtik aktiler jobalaryn qoǵamdyq talqylaý olardy qabyldaý úshin mindetti shart  bolyp tabylady. Sonymen qatar, «Ashyq bıýdjetter» portalynda 2 myńnan astam materıal men kópshilik talqysyna salý úshin 6 myńnan astam bıýdjettik baǵdarlamalar jobalary jarııalanǵan. «Ashyq málimetter» portalynda 2 myńnan astam málimetter jıyntyǵy jarııalanyp, júktep alýǵa arnalǵan 21 mobıldik qosymsha men servıs ázirlenip, ornalastyrylǵan. Jalpy, 2016 jyly «Ashyq dıalog» portalynyń blog-platformasy arqyly 9,5 myń saýalǵa jaýap berilgen. Sonymen qatar, blog-platformaǵa jergilikti jerlerde áleýmettik mańyzǵa ıe máselelerdi shuǵyl sheshý úshin jergilikti atqarýshy organdar tartylǵan. Aıtar bolsaq, 2017 jyly «Memlekettik organdardyń qyzmetiniń tıimdiligin baǵalaý» portaly iske qosyldy. Onda qoǵamdyq talqylaýǵa salý úshin memlekettik organdardyń qyzmetin baǵalaý qorytyndylary týraly aqparat, strategııalyq josparlar men aýmaqtardy damytý baǵdarlamasynyń maqsatty kórsetkishterine qol jetkizý boıynsha esepter ornalastyrylatyn bolady.