«Teńizshevroılda» 20 myńnan astam jumys orny ashylady

«Teńizshevroıl» JShS-nyń bolashaq keńeıtý jobasy sheńberinde 20 myńnan astam jumys orny ashylady, dep jazady abctv.kz. Bul týraly búgin ótken «Teńizshevroıl» JShS-ny bolashaq keńeıtý jobasy – Saǵalyq qysymdy basqarý jobasynyń qurylys kompanııalarynyń forýmynda QR Eńbek jáne halyqty áleýmettik qorǵaý vıse-mınıstri Birjan Nurymbetov habarlady. Is-sharaǵa ortalyq jáne jergilikti atqarýshy organdardyń, «Teńizshevroıl» JShS-nyń qazaqstandyq jáne halyqaralyq merdigerlik uıymdarynyń ókilderi qatysty. Birjan Nurymbetov óz sózinde joǵaryda aıtylǵan «Teńizshevroıl» JShS jobasy memlekettegi óte sátti uzaqmerzimdi ınvestısııalyq saıasattyń kórinisi bolyp tabylatynyn atap ótti. Osy jobada shoǵyrlanatyn sheteldik ınvestısııalar mýltıplıkatıvtik áser berip, bıznestiń damýyna, sonymen qatar halyqtyń áleýmettik jaı-kúıin jaqsartýǵa yqpalyn tıgizedi. «Búginde «Teńizshevroıl» JShS-nyń derekteri boıynsha Bolashaq keńeıtý-Saǵalyq qysymdy basqarý jobasyna 10,5 myń adam jumysqa ornalastyrylǵan, onyń ishinde   9,4 myńy jergilikti qyzmetkerler, bul Qazaqstanda jumys isteıtin jobadaǵy barlyq personaldyń 90 %-yn quraıdy. Úkimet Bolashaq keńeıtý-Saǵalyq qysymdy basqarý jobasy sheńberinde Qazaqstan boıynsha 20 myńnan astam jumys orny ashylady dep kútýde, bul rette kadrlarǵa degen jergilikti qamtylym shamamen 18 myń adamǵa jetýi múmkin. Sondaı-aq «Teńizshevroıl» JShS qazaqstandyq kadrlardy oqytý jáne daıyndaý mindettemesin óz moınyna alyp otyr», – dedi Birjan Nurymbetov. QR Eńbek jáne halyqty áleýmettik qorǵaý mınıstrliginiń baspasóz qyzmetiniń málimetinshe, bolashaq keńeıtý-Saǵalyq qysymdy basqarý jobasyna Atyraý men Mańǵystaý oblystarynan jáne jaqyn ornalasqan óńirlerden (Aqtóbe, Qyzylorda, Batys Qazaqstan oblystary) jumyskerler tartý josparlanyp otyr.