Foto: Ashyq derekkóz
QS pándik reıtıngteri – 100 el men aýmaqtan 1900 ýnıversıtet usynǵan 21 000-nan astam bilim berý baǵdarlamasyna jasalǵan táýelsiz salystyrmaly taldaý. Reıtıng 55 pándi qamtyp, olar 5 iri baǵytqa biriktirilgen, atap aıtqanda, «О́ner jáne gýmanıtarlyq ǵylymdar», «Injenerlik jáne tehnologııalar», «О́mir jáne medısına ǵylymdary», «Jaratylystaný ǵylymdary», «Áleýmettik ǵylymdar jáne basqarý».
Elimizdegi joǵary oqý oryndary arasynda ál-Farabı atyndaǵy Qazaq ulttyq ýnıversıteti kósh bastap, 4 salalyq jáne 23 pándik reıtıngke endi. Odan keıin L. Gýmılev atyndaǵy Eýrazııa ulttyq ýnıversıteti 1 salalyq jáne 15 pándik reıtıngte kórindi.
Sonymen qatar Qazaq ulttyq agrarlyq zertteý ýnıversıteti, Qurmanǵazy atyndaǵy Qazaq ulttyq konservatorııasy jáne Abaı atyndaǵy Qazaq ulttyq pedagogıkalyq ýnıversıteti ózderiniń beıindik baǵyttary boıynsha aldyńǵy qatardan oryn aldy.
Abaı ýnıversıtetinde áıelder kóshbasshylyǵy magıstrlik baǵdarlamasy iske qosylady
QS sarapshylarynyń baǵalaýynsha, Qazaqstan ýnıversıtetteri halyqaralyq arenadaǵy pozısııasyn júıeli túrde kúsheıtip, pándik reıtıngterdegi qatysý aıasyn keńeıtip keledi. Uıymnyń aǵa vıse-prezıdenti Ben Saýter bul úrdisti joǵary baǵalady.
Onyń aıtýynsha, 2026 jylǵy reıtıng nátıjeleri Qazaqstannyń joǵary bilim berý júıesi básekege qabilettiligin arttyryp otyrǵanyn dáleldeıdi. Ásirese, jańa pánder boıynsha 14 bilim berý baǵdarlamasynyń alǵash ret enýi – halyqaralyq tanymaldyqtyń óskenin aıǵaqtaıdy. Buǵan qosa, «Bilim berý» men «Lıngvıstıka» baǵyttary boıynsha kórsetkishter jaqsaryp, «Oryndaýshylyq óner» salasynda alǵash ret TOP-100 qataryna kirýi mańyzdy jetistik boldy.
QS-tiń óńirlik dırektory Sergeı Hrıstolıýbov Qazaqstannyń bul baǵyttaǵy ilgerileýin atap ótti. Onyń sózinshe, Qazaqstan Ortalyq Azııa elderi arasynda pándik reıtıngterdiń TOP-100 tiziminde usynylǵan jalǵyz memleket bolyp otyr.
Sondaı-aq ol «Bilim berý jáne oqytý» baǵyty boıynsha TOP-50-ge ený – óńir tarıhyndaǵy eń joǵary nátıje ekenin jetkizdi. Bul jetistik Abaı atyndaǵy Qazaq ulttyq pedagogıkalyq ýnıversıtetine ǵana emes, jalpy ulttyq joǵary bilim berý júıesine ortaq tabys sanalady.
Jalpy alǵanda, QS World University Rankings by Subject 2026 nátıjeleri Qazaqstannyń álemdik bilim keńistigindegi ornyn aıqyndaı túsedi. Pándik reıtıngterdegi qatysýshy ýnıversıtetter sanynyń artýy, jańa baǵyttardyń qosylýy jáne jekelegen pánderdegi jetistikter eldiń akademııalyq áleýetiniń kúsheıgenin jáne Ortalyq Azııadaǵy jetekshi bilim ortalyǵy retindegi róliniń nyǵaıǵanyn kórsetedi.
