Májilis depýtattary Joldaýǵa ún qosty

Ortalyq kommýnıkasııalar qyzmetinde Elbasy Nursultan Nazarbaevtyń Qazaqstan halqyna Joldaýyna baılanysty brıfıng ótti. Oǵan Májilis tóraǵasynyń orynbasary, «Nur Otan» fraksııasynyń jetekshisi Gúlmıra Esembaeva, depýtattar Gúljan Qaraqusova men Nurtaı Sábılıanov qatysty. Jıynda Májilis depýtattary Joldaýdyń máni men mańyzyn, onyń alǵa qoıǵan maqsaty men mindetterin aıtyp, óz pikirlerin bildirdi.  Onda G.Esembaeva el ishinde Elbasynyń Joldaýy dástúrge aınalǵanyn, ony Qazaqstan halqynyń jyl saıyn taǵatsyzdana kútetinin, óıtkeni, qujatta elimizdiń sońǵy jyldary atqarǵan jumystary qorytyndylanyp, bolashaqqa baǵyt-baǵdary kórsetiletinin atap ótti. -Qazirgi kezde, - dedi «Nur Otan» fraksııasynyń jetekshisi, – elimizde kóptegen baǵdarlamalar qabyldanyp, jumystar jasalyp jatyr. Biz táýelsizdigimizdi nyǵaıtýda tarıhı kezeńderden ótip,  elimizdi damytýda múmkindiktiń bárin jasap kelemiz. Búginde júzdegen aýrýhanalar men mektepter, myńdaǵan shaqyrym joldar, júz myńdaǵan sharshy metr turǵyn úıler salynýda. Osynyń bári birlik pen berekeniń, Qazaqstan halqynyń Memleket basshysynyń aınalasyna toptasyp, birigip jumys istegeniniń arqasy dep bilemin. Osyǵan baılanysty ol elimizdiń eki tarıhı kezeńnen ótkenin, endi aldymyzda úshinshi jańǵyrtý kezeńi turǵanyn, bul jahandyq básekege qabiletti bolý kezeńi bolatynyn aıtty. «О́zderińiz jaqsy bilesizder, – dedi G.Esembaeva, – Qazaqstan álemdegi básekege qabiletti 50 eldiń qataryna kirip otyr. Bizdiń el munymen toqtamaıdy. Endigi kezekte elimizdiń maqsaty – 30 eldiń qataryna qosylý. Oǵan Prezıdenttiń ekonomıkany ártaraptandyrý, kásipkerlikti damytý men basqa da tapsyrmalaryn oryndasaq qana jete alamyz». Osy jerde halyq qalaýlysy Elbasynyń bıylǵy Joldaýdaǵy tapsyrmalaryna, onyń mańyzdylyǵyna keńinen toqtaldy. –Bıylǵy Joldaýda elimizdiń jahandyq básekege qabilettiligine basa nazar aýdaryldy. Rasymen de qazirgi kezde álemniń túkpir-túkpirinde básekelestik kúsheıip jatyr. Bizdiń elge de bolashaqta ıyq tirese júrip, basqa memleketterge óz ónimderimizdi ótkizýge daıyn bolýy kerek. Báskege qabiletti bolý degenimiz – bıznestiń qarapaıym qaǵıdasy, erejesi. Ol úshin árıne, áýeli halyqqa kásipkerlikpen aınalysýǵa múmkindik berip, shaǵyn bıznesti damytýǵa jaǵdaı jasaýymyz kerek. Elbasy Joldaýda osy jaǵyn jaqsy aıtty. Búgingi tańda jer-júzinde IT tehnologııasy damyǵan, aýyl sharýashylyǵy shalqyǵan elder ǵana qara úzip, alǵa shyǵyp jatqanyn bilemiz. Eger memleket óz halqyn jaqsy ónimmen qamtamasyz etip, taǵamdaryn taza, sapaly jasaǵysy kelse, aldymen óz eliniń aýyl sharýashylyǵyn damytýdan bastaý kerek. Prezıdent Joldaýda osy jaǵyn qadap aıtyp, naqty tapsyrmalar berdi. Sonymen birge bilim berý men densaýlyq saqtaý salasyn damytyp, eldiń qaýipsizdigin qamtamasyz etý týraly aıtty. Men Májilistegi «Nur Otan» partııasy fraksııasynyń jetekshisi retinde partııanyń Memleket basshysynyń tapsyrmalaryn oryndap, alǵan qoıǵan maqsat-mindetterin qoldaıtynyn aıtqym keledi. Jahandyq básekege qabilettilik – Joldaýdaǵy negizgi baǵdarlamalyq qujat. Ekonomıkanyń damýy  kásipkerlikti jan-jaqty qoldap, damytýǵa baılanysty. Bizdiń básekege qabiletti elimiz, álem moıyndaǵan Elbasymyz bar, – dedi Májilis tóraǵasynyń orynbasary. Osydan keıin jıynda Májilistiń Qarjy jáne bıýdjet komıtetiniń tóraıymy Gúljan Qaraqusova Prezıdenttiń Joldaýda qarjy júıesi men bank sektoryn damytý, nesıe alý, ony tıimdi paıdalaný týraly tapsyrmalaryna qatysty óz pikirin bildirdi. Ol álemniń barlyq elderi kásipkerlikti damytý úshin halyqqa nesıe berýmen aınalysatynyn, onyń óz isin bastaǵan adamǵa jáne bankterge tıimdi bolý úshin barlyq jaǵdaıdy jasaıtynyn aıtty. –Bizdiń elde memleket pen kásipkerler arasynda áriptestik qalyptasyp keledi. Alaıda, nesıe berý isiniń aqsańdap jatqany da bar. Sondyqtan Memleket basshysynyń shaǵyn bıznesti qoldaý týraly oılarymen tolyq kelisemin jáne qoldaımyn. Jalpy, elimizde nesıe berý, qarjy salasyn retteý jumysyn baqylaıtyn bir organ bolǵany durys. Ol Ulttyq bank bolýy kerek, – dedi G.Qaraqusova. Brıfıngte kelesi kezekte Májilistiń Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov sóz aldy. Ol bıylǵy Joldaýdyń elimizdiń básekege qabilettiligin arttyrý maqsatynda jasalǵanyn, osy qujattyń negizinde kásipkerlikti, eldi-mekenderde ınternet júıesi men sandyq tehnologııany damytý kózdelip otyrǵanyn atap ótti. –Jasyratyny joq, qazir shalǵaı aýyldarda, basqa da jerlerde ınternet júıesiniń jyldamdyǵyn jaqsartý kerek. Joldaýda Prezıdent osy máseleni kóterip, sandyq baǵdarlama jasaýdy usyndy. Bul qujatta ınternet júıesiniń jyldamdyǵy artyp, sapasyn jaqsartý kózdelgen.  Elbasy kásipkerlerdiń jumysyna kedergi keltirmeý týraly da tapsyrma berdi.  Qazir keıbir jerde kásipkerlerge kedergi jasalyp jatqany ras. Sonyń kesirinen shaǵyn bıznespen aınalysyp jatqan adamdar isin dóńgelete almaı keledi. Sondyqtan Prezıdent Joldaýda bızneske kedergi ketirmeý týraly basa  aıtty, – dedi ol. Sonymen birge ol kásipkerlikti damytý máselesinde Elbasynyń aýyl sharýashylyǵyna qatysty oılarymen tolyq kelisetinin, óıtkeni, eldiń berekesi men merekesi, halyqtyń ósip-órkendeýi osy salamen tyǵyz baılanysty ekenin jetkizdi.  Osy oraıda N.Sabılıanov nesıeni aýyl sharýashylyǵyn damytýǵa degen yntasy, jigeri bar azamatarǵa berilý kerektigin, solar otandyq ónimdi kóbeıtip, taýarlardy eksportqa shyǵarsa elimizge paıda ǵana ákeletinin aıtty. «Bıylǵy Joldaýda Nursultan Ábishuly básekege qabilettilik agrarlyq sektorǵa baılanysty ekenin, sol úshin osy salany damytý týraly naqtyly tapsyrmalar berdi. Ony damytýdyń birneshe jolyn kórsetip, maqsat-mindetter qoıdy. Mysaly, qazir sýbsıdııa máselesi de ózekti bolyp tur. Búginde elimizde sýbsıdııany iri sharýa qojalyqtary alsa, bolashaqta ony shaǵyn bızneske de kóbirek berý kerek dep oılaımyn. Ekinshi másele, agrarlyq sektormen naqty aınalysatyn qurylymdardyń jumysyn baqylaýdy kúsheıtý kerek. Osy maqstata Prezıdent «Báıterek» holdıngi men «QazAgro» kompanııasyn biriktirý týraly tapsyrma berdi. Bul óte durys sheshim boldy. Qazir «Samuryq-Qazyna» Ulttyq ál-aýqat qory» AQ-nyń 500-den asa enshiles kompanııalary bolsa, «QazAgroda» 7, «Báıterekte» 11 kásiporyn bar. Solardyń bári tize qosyp jumys istese agrarlyq sektor damıtyny sózsiz», – dedi ol. Jıynda Májilis depýtaty Joldaýda sybaılas jemqorlyq, memlekettik satyp alý máselesine keńirek toqtalǵanyn, Qazaqstan damyǵan elderdiń qataryna qosylamyn dese jemqorlyq degen jegiqurtpen kúresýdi toqtatpaı, memlekettik satyp alýda qatań tártip pen baqylaýdy kúsheıtý kerektigin aıtty. Dastan KENJALIN, «Egemen Qazaqstan»