Chempıondar lıgasy. PSJ «Barselonany» iri eseppen jeńdi (vıdeo)

Chempıondar lıgasynyń 1/8 fınalynda Fransııanyń «Parı Sen Jermen» komandasy óz alańynda Ispanııanyń «Barselonasyn» qabyldap, 4:0 esebimen jeńiske jetti. Match bastalysymen alǵa umtylǵan parıjdikter birqatar qaýipti shabýyl uıymdastyrdy. Biraq esep 18-mınýtta ǵana ashyldy. Aıyp dobyn oryndaǵan Anhel Dı Marııa qaqpany dál kózdep, ujymyn alǵa shyǵardy. Osydan keıin «Barselona» tarazy basyn teńestiretin múmkindigi bolyp edi. Biraq qaqpashy Kevın Trappen jeke shyqqan Andre Gomesh aılasyn asyra almady. Esesine alań ıeleri qarqynyn arttyryp, eseptegi basymdyqty arttyra tústi. 40-mınýtta komandaǵa jaqynda ǵana qosylǵan Iýlıan Draksler otandasy Mark-Andre Ter Shtegenge ekinshi dopty soqty. Chempıondar lıgasynyń favorıti sanalǵan katalondyqtar bul matchta jaqsy oıyn kórsete almady. Qarymta shabýyldarǵa shyqqanmen, bári sátsiz aıaqtalyp jatty. Al Ýnaı Emerı shákirtteri kerisinshe, ár shabýyldy nátıjeli aıaqtaýǵa tyrysyp baqty. Nátıjesinde, 55-mınýtta úshinshi goldaryn soǵyp úlgerdi. Dı Marııa qaqpanyń toǵyzdyǵyn dál kózdep, bul matchtaǵy dýblin jasady. Al 72-mınýtta Edınson Kavanı sońǵy goldy soqty.