Jaqııanov EKSPO kezinde uıymdastyrylatyn boks keshinde sharshy alańǵa shyǵa ma?

WBA (Super) jáne IBO tujyrymdary boıynsha jeńil salmaqtaǵy jańa álem chempıony qazaqstandyq Janat Jaqııanov (27-1, 18 KO) búgin, 15 aqpanda Qazaqstanǵa oraldy, dep habarlaıdy vesti.kz. Janatty Petropavlda áıeli men kishkentaı qyzy kútip otyr. Al boksshyny Astanada jankúıerleri kútip alǵan. Jankúıerleriniń ystyq yqylasyna bólengen ol aldaǵy eki aıda ýaqytyn tek demalysqa bóletinin aıtty. «Álemdik tıtýldy qorǵaǵannan ony jeńip alǵan ońaıyraq shyǵar. Sebebi, mundaı jetistikke árkimniń-aq bar talasy. Endi men kem degende eki aı demalyp, sodan keıin komandammen jáne menedjerimmen birge aldaǵy jekpe-jegim jaıly aqyldasamyn», – dedi Jaqııanov. Buǵan deıin Astanada EKSPO kórmesiniń aıasynda boks keshi uıymdastyrylatyny jaıly aıtylǵan bolatyn. «Boks keshine qatysatynym ázirge belgisiz. Qazir kelissózder júrgizilip jatqany ras. Biraq kesip eshnárse aıta almaımyn», – dedi boksshy. Degenmen, osy ýaqytta boksshynyń bapkeri Rıkkı Hatton kelesi qarsylasynyń aty-jónin aıtyp úlgerdi. Onyń aıtýynsha, qazaqstandyq boksshy tıtýlyn qorǵaý úshin Ulybrıtanııanyń boksshysy Djeımı Makdonnellmen (29-2-1, 13 KO) judyryqtasady. Makdonnell – osy kategorııada WBA tujyrymy boıynsha turaqty chempıony. Aıta keteıik, 11 aqpanda Janat Jaqııanov AQSh-tyń Toledo qalasynda amerıkalyq Roýshı Ýorrenmen judyryqtasyp, 12 raýndtyń qorytyndysy boıynsha jeńiske jetken. Osy jeńisiniń arqasynda WBA (Super) jáne IBO tujyrymdary boıynsha jańa álem chempıony atandy.