Munaı ónimderin kóp tutynamyz

Qazaqstanda munaı ónimderin tutyný kólemi jyl saıyn artyp keledi. Oǵan elimizdegi jeńil avtokólikterdiń edáýir kóbeıýi áser etti. Bul týraly Ortalyq kommýnıkasııalar qyzmetinde ótken baspasóz máslıhatynda Energetıka vıse-mınıstri Áset Maǵaýov málim etti. Onyń aıtýynsha, elimizde benzın baǵasynyń qymbattaýyna munaı ónimderin tutyný kóleminiń edáýir artýy áser etken. «Búgingi tańda halyqtyń, sondaı-aq, kóptegen BAQ ókilderiniń kókeıinde júrgen suraq benzın baǵasyna baılanysty ekeni túsinikti. Birinshiden, elimizde munaı ónimderin tutyný kóleminiń edáýir artqanyn atap ótken jón. Keshe biz osy máselege baılanysty dóńgelek ústel ótkizdik. Munaı ónimderin tutyný kóleminiń edáýir artýy elimizde jeńil avtokólik sanynyń aıtarlyqtaı ósýimen baılanysty. Máselen, 2001 jyly elimizdegi jeńil avtokólik sany 1 mln 58 myń bolsa, 2016 jyly olardyń sany 3 mln 924 myńdy qurady. Sáıkesinshe, munaı ónimderin tutyný kólemi de 2001 jylǵy 3 mln 590 myńnan 2016 jyly 8 mln 775 myńǵa artty. Elimizde jeńil avtokólik sany men munaı ónimderin tutyný kóleminiń artýyna baılanysty benzın baǵasy ósti», – dep túsindirdi Á.Maǵaýov. Ol sondaı-aq, suranysqa saı munaı óńdeý zaýyttary da jyl saıyn óz ónimderiniń kólemin arttyryp kele jatqanyn atap ótti. «2001 jyly avtokólik benzınin óndirý kórsetkishi 1 mln 536 myń tonna bolsa, 2016 jyly bul kórsetkish 2 mln 900 myń tonnaǵa deıin ósti, – dedi vıse-mınıstr. – Áıtse de, munaı ónimderin óndirý kólemi eki esege artqanymen, Qazaqstan áli de ımportqa táýeldi. Eldegi tutynatyn benzınniń 30 paıyzy, al dızel otynynyń 15 paıyzy kórshi Reseıden satyp alynady». Aıdar О́RISBAEV, «Egemen Qazaqstan»