Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ótken Salyq kodeksin engizý jónindegi jobalyq keńseniń 11-otyrysynda buǵan deıin qosymsha taldaýdy qajet etken birqatar máseleler qaraldy.
Solardyń biri – «Elektr qýaty naryǵynyń qazaqstandyq operatory» AQ men «Jańartylatyn energııa kózderin qoldaý jónindegi qarjy-esep aıyrysý ortalyǵy» JShS úshin elektrondy shot-faktýralardy rásimdeý merzimin qaıta qaraý boldy. Bul másele buǵan deıin 9-otyrysta talqylanyp, qosymsha saraptama júrgizý qajettiligi týyndaǵan edi.
Digital Qazaqstan: Energetıka ınfraqurylymy onlaın júıege biriktirildi
Merzimdi ózgertý elektr energııasynyń teńgerimdeýshi naryǵynyń jumys ereksheligimen baılanysty. Naqty tutyný derekteri eseptik aıdan keıingi aıdyń 20-synan keıin ǵana qalyptasyp, qoljetimdi bolady. Sonyń saldarynan naryq qatysýshylary bastapqyda aldyn ala málimettermen qujat tapsyryp, keıin naqty derekterge sáıkes túzetýler engizýge májbúr.
2026 jyldan bastap túzetilgen elektrondy shot-faktýralardy mindetti túrde rastaý talap etiletinin eskersek, qoldanystaǵy merzimder qujattardy durys rásimdeýde táýekelder týyndatýy múmkin.
Osyǵan baılanysty salanyń erekshelikterin eskere otyryp, EShF jazyp berý merzimin aýystyrý usynysy qarastyryldy. Talqylaý nátıjesinde bul usynys qoldaý taýyp, jańa merzim eseptik aıdan keıingi aıdyń 27-sine deıin bolyp belgilendi. Tıisti ózgerister Salyq kodeksine retrospektıvti túrde engizilip, 2026 jylǵy 1 qańtardan bastap kúshine enedi dep josparlanyp otyr.
Sonymen qatar otyrysta taý-ken-metallýrgııa salasyndaǵy salyqtyq retteý máseleleri de talqylandy. Atap aıtqanda, koksteletin kómirge paıdaly qazbalardy óndirýge salynatyn salyqty qoldaný qaraldy. Máseleniń kúrdeliligine baılanysty bul baǵyttaǵy jumys qosymsha bir aıǵa uzartylyp, jan-jaqty zerdeleý jalǵasatyn boldy.
