Discovery qazaqsha sóıleıdi

Birinshi naýryzdan bastap elimizde Discovery Showcase HD telearnasy habar tarata bastaıdy, ol ýaqyt óte qazaq tiline ótedi. Bul týraly "Qazteleradıo" aksıonerlik qoǵamy baspasóz qyzmeti málim etti, dep jazady abctv.kz. Aǵymdaǵy jyldyń 1 naýryzynan bastap Discovery Networks CEEMEA, seriktesi — "Qazteleradıo" aksıonerlik qoǵamymen birlese otyryp, Qazaqstanda jańa — Discovery Showcase HD arnasyn iske qosady. Ol Discovery brendteri portfolıosynan eń jarqyn jáne eń tanymal shoýlaryn biriktiredi — Discovery Channel, Animal Planet, TLC, Discovery Science jáne ID Xtra, bul rette tanymdyq-oıyn-saýyqtyq kontent  HD sapada qoljetimdi bolmaq. Sonymen qatar, kórermenderge eksklıýzıvti materıaldar kórsetiletin bolady, árıne tek Discovery Showcase HD arnasy arqyly.  Discovery Showcase HD sheteldik arnalardyń alǵashqysy bolyp Qazaqstan Respýblıkasy aýdıtorııasyna súıikti shoý baǵdarlamalaryn HD sapada memlekettik tilde kórýdi usynady. Birinshi kezeńde kórermenge telebaǵdarlamalar qazaq tilinde praım-taım ýaqytynda usynylady (18:00-den tún ortasyna deıin). Jyl boıy qazaq tilindegi baǵdarlamalarynyń úlesi ulǵaıatyn bolady jáne 2018 jylǵy qańtardan bastap barlyq mazmuny tolyǵymen qazaqshalanady. Sonymen birge, kórermen óziniń qabyldaǵyshynyń parametrlerinen arnany orys tilinde kórýdi tańdaı alady. Birinshi bolyp qazaq tiline "Morgan Frımenmen jahan qupııalaryn taný", "Tańǵalaryq muhıt", "Alıaska: ormandaǵy otbasy", "Kıt aýlaýǵa qarsy soǵys" syndy baǵdarlamalary jáne Discovery Networks-tyń basqa da mańyzdy jobalary aýdarylady. "Qazaqstan — Discovery Networks úshin adal jáne óte mańyzdy aýdıtorııasy men úlken áleýeti bar aımaq. Biz kórermenderge eń jarqyn, tanymal jáne qyzyqty baǵdarlamalardy biriktiretin joǵary aıqyndyq formatyndaǵy Discovery-diń jańa telearnasyn usynǵanymyzǵa óte qýanyshtymyz", — deıdi Discovery Networks kompanııasynyń Soltústik-Shyǵys Eýropadaǵy vıse-prezıdenti, basqarýshy dırektory Anna Pak.