Qoladan júlde jınadyq

Kúnshyǵys eliniń Sapporo qalasynda ótip jatqan VIII qysqy Azııa oıyndarynyń kórigi qyza tústi. Tórtinshi jarys kúni Qazaqstan quramasynyń qorjynyna úsh birdeı qola medal syılady. Sonymen qatar, shaıbaly hokkeı synyn bastap ket­ken el quramasy ońtústikkoreıalyq qar­sy­lastaryn 4:0 esebimen kúırete jeńdi. Shańǵymen tuǵyrdan sekirý jarysynda elimizdiń namysyn qorǵaǵan Sergeı Tkachenko 238.0 metr nátıjemen úshinshi orynǵa taban tiredi. Bul bá­sekede bárinen alys sekirgen japon jigiti Iýkııa Sato (254.0) altyn júlde ıegeri atandy. Ekinshi júlde – kúmis medal chempıonnyń jer­lesi Iýken Ivasaǵa (251.0) buıyrdy. Qyzdar arasyndaǵy short-trek­shiler saıysynda Qa­zaqstan qurama ko­mandasy táp-táýir nátıjege qol jet­kizdi. Quramynda Kım Iong A, Anastasııa Krestova, Mádına Jan­bosynova jáne Olga Tıhonova bar jelaıaq qyz­darymyz 4:20.034 mınýt nátıjemen qola júldege ıe boldy. Bizdiń short-trek­shi arýla­rymyzdyń jolyn Oń­tústik Ko­reıa (4:10.515) jáne Qytaı (4:10.980) quramalary orap ketti. Bul kúni konkıshi jigitte­rimiz de kóńildi kóterip tastady. Erler arasyndaǵy qýdalaý bá­s­ekesinde quramynda Dmı­t­rıı Babenko, Denıs Kýzın jáne Fedor Mezensev óner kórsetken Qazaqstan komandasy qola me­dalǵa qol jetkizdi. Bul jarys­ta Ońtústik Koreıa men Japonııa komandalary úzdik nátıje kórsetti. Qazaqstan hokkeıshileri Azıa­da synyndaǵy alǵashqy kez­­desýin Ońtústik Koreıa qura­­ma­symen ótkizdi. Sergeı Sta­rygınniń shákirtteri senimdi oıyn órnegin kórsetip, 4:0 (0:0, 2:0, 2:0) esebimen jeńiske jetti. Komandalar matchtyń bi­rinshi bóliginde teń tarqasty. Ekinshi kezeńniń 34-mınýtynda Maksım Volkov qarsylas qaqpadan sańylaý taýyp, esep ashty. Arada eki mınýt ótke­ninde Nıkıta Mıhaılıs esepti eseledi. Sheshýshi kezeńniń 47-shi mınýtynda Nursultan Belgibaev esepti 3:0-ge jetkizdi. Al sońǵy – tórtinshi shaıbany oıynnyń 54-mınýtynda Konstantın Sa­ven­kov saldy. Endi bizdiń hokkeıshiler kelesi oıyndy 24 aqpan kúni Qytaı quramasymen ótkizedi. Ázirge Qazaqstan qura­masy­­nyń enshisinde jeti júl­de bar. Onyń bireýi altyn, ekeýi kúmis jáne tórteýi qola. Medal sany bo­ıyn­sha jalpykomandalyq esepte tórtinshi orynda turmyz. Bul básekede 30 medalmen (12 altyn, 11 kúmis jáne 7 qola) Ońtústik Koreıa quramasy kósh bastap keledi. Ekinshi oryndaǵy Japonııa qorjynynda 34 medal (10, 11, 13) bar. Al úshinshi orynda 16 medalmen (6,5,5) Qytaı quramasy keledi. Qaırat ÁBILDINOV, «Egemen Qazaqstan»,